Pregled tisKAJna

Varaždinske vesti, br. 3525, 24.07.2012.

KAJ je naše pitanje i naš odgovor

Sunce peče. Pokle kupanja se ne zležava na kamenju nek se odma ide doma ili se ljudi sklanjaju v hlad pod suncobrane. Pod jenim suncobranom njih pet-šest na glas raspravlja, i to po domači, na kajkavskom, tak da zgledi da se Varaždin preselil na Jadran ili su si z mora pričeli kajkati kaj je male teže poverovati pokle “Larinoga izbora”

Ljeto je zašlo v svoju najvišešu fazu. Vručina nas je pritisnula. Dišemo kak na škrge, zastiremo obluke, spuštamo roletne, bežimo v hladovinu, iščemo osveženje vu vodi; doma pod tušem, na kakvom bajeru, a puno njih i na morju. S time se i meni posrečilo. Otputujem na naš najbližeši otok, mam odbežim na plažu i sprobam vodu. Topla je, a gda zaroniš i počneš plivati, ne da ti se vun.

More je kak naslikano, čisto je i bistro i plavi se, onak mirno kak ulje ili se same male mreška. Sunce peče. Pokle kupanja se ne zležava na kamenju nek se odma ide doma ili se ljudi sklanjaju v hlad pod suncobrane. Pod jenim suncobranom njih pet-šest na glas raspravlja, i to po domači, na kajkavskom, tak da zgledi da se Varaždin preselil na Jadran ili su si z mora pričeli kajkati kaj je male teže poverovati pokle “Larinoga izbora”, v šterom se preliepa Lara nekak preduge odlučivala koga ili kaj da zbere. Morti je baš tie izbor začel diskusiju. Ak i nečem, čujem o čem se to svade. Največ se spominjalo jeno ime štero je preplavilo se TV-zaslone i dnevne novine.

A bormeš se i filozofiralo o marksizmu, moralnom imperativu i slobodi izbora, o agnosticizmu i ateizmu onieh na vlasti… (Pa kie smie reči da je Varaždin kulturna žabokrečina a Varaždinci neškolovani?)

– Ja tu slobodu izbora najmenj razmem. Če boga nema i imamo tu slobodu, kaj sam morti ja zebral da mi poduzeče propadne, a mene šupiraju v mirovinu z šteru ni pesa nemrem prehraniti?
– A došel si na more!
– Je, susedu zmortati garažu!
– Tak? Siva ekonomija? Sam nek te ne čuje Linić.
– Kak ne kužite, dečki. Gda se nekaj zbere, zbereju se i posljedice štere to suobu donaša. A oni štere smo si mi zebrali da vladaju, ne veruju v boga, pak saki za se misli da je bog. Bez boga nikak! Kie v ruke derži sekiru, more i ciepati.
– Ah, se je to fiškalska sljeparija. A ja se razmem same v zidariju i preferans.
Mene pak je vuru i pol plivanja zmučilo.
– Idem doma. Idem pisati tekst – rečem svoje družbe, štera se spravljala za još jen skok v morje.

Dek su si došli doma, tekst je bil pri kraju. Baš sam napisala nekaj o Ivici Jembrihu i citierala njegvu popiefku “Rieč od cvietja”. Moj domačin se nagne nad mene.

– A kie ti je tie? Mi v Zagrebu male kaj o njemu znamo. Same smo ga jemput vidli v Županijske panorame. Nekaj je recitieral vu velikem klobuku.
-To ti je veliki zagovornik i čuvar kajkavščine rodom z Mača. Ima priek dvajset pesnički zbirki, a največ o kajkavščine.
– Liepo, liepo! Same, nekak mi nekaj fali. Pišeš same o riečima, a nigdi si nie spomenula Čačića. On je “in”.
– Niti nebum. Kaj bi njemu moja reklama!

http://varazdinske-vijesti.hr/kaj-je-nase-pitanje-i-nas-odgovor/varazdin-se-preselil-na-jadran.html
i(l)
str. 20. sim:
http://varazdinske-vijesti.hr/pdf/3525.pdf

* * * * * * * * * * * * * * * * * * * *

Anđelko Igrec: Capriccio Garestinensis, tema “Ja sem Varaždinec”, 06:49