Pregled tisKAJna

Zagorski list br. 304 / 14.08.2009. / županija (papérnato izdâjne)

ZA DUŠU, ZA SPOMENEK

Velika Meša

Svetkuvanje po fara gde su bila prščenja za Veljiku Mešu bilje je navike najvekše i najljepše. Negda, gda je svetek prihajal h tjednu, nie se bilje doma. Radniki su išlji na posel po fabrika, štacune ilji gde bi več delalji. Unda te nie bil državni praznik, alji se h duša i srca ljudi fejst svetkuvalje. Denes je Veljika Meša državni i crkveni svetek, alji po tomu kak zgledi teške je te moči reči. Ljudi od rana larmaju, hodiju po sakojačke posle, štacuni največ dielaju i larma se po vunjke, kak i saki dan.

Piše: Nevenka Gregurić
 

Velika Meša najveći je ljietni svetek. Te je dan teri se svetkuje kak na spomen cajtu gda su Majku Božju odneslji h nebe z tieljem i dušu. Na tie veljiki svetek pri nas se od vajkada išlje po prščenja h miesta gde su bilji kipi Majke Božje. Nam Zagorcem najbljižeša je Majka Božja Bistrička, Gorska h Loboru, drugem Majka Božja Trsatska, Sinjska, Aljmaška i tak dalje i dalje. Dobre je znane, nam stariejšem, kak su ljudi navieke hodilji na Bistricu, pešice ilji z konji, a nekteri i z cugem. Ljudi z druge kraje na Veljiku Mešu ilji h nedelju prie ilji poklje toga svetka putuvalji su največ z cugem. Cugi su bilji na te dane tak puni kaj su ljudi stalji na štienga cuga. Gda sme mi deca lukalji cuge pune preščenjare, ljudi su zgledalji h grunjču kaj čele gda su se rojile. Črni krovi cuga bilji su pocinfrani z proščenjari teri su po njemu sedelji. Tuj su sedelji kak muži tak i babe, i za nas unda, čudne obljiečene. Gda sme mi deca poodraslji zeznalji sme da su ljudi na prščenje k Majke Božje išlji h svoje nasvetiečnejše obljeke ilji h narodne nošnje. Saka bi baba h ruka imiela ceker, košaru ilji torbu z tere su dišalji sulji bez teruga se nie išlje na prščenje. Jesti strošek na prščenju teri se donesel od doma i k njemu kupil kakef vieršljin bila je najbolša košta teru se unda moglje jesti. Pečene mlade guske i race, šopane same za priljiku gda se išlje za Veljiku Mešu na prščenje, imele su tak fini žmah kaj se je z slašču oglobala saka koščička. Duha friške pečene gibeničke i kruha, takaj je bila diel sake košare ilji cekera.

Svetkuvanje po fara gde su bila prščenja za Veljiku Mešu bilje je navike najvekše i najljepše. Negda, gda je svetek prihajal h tjednu, nie se bilje doma. Radniki su išlji na posel po fabrika, štacune ilji gde bi več delalji. Unda te nie bil državni praznik, alji se h duša i srca ljudi fejst svetkuvalje. Denes je Veljika Meša državni i crkveni svetek, alji po tomu kak zgledi teške je te moči reči. Ljudi od rana larmaju, hodiju po sakojačke posle, štacuni največ dielaju i larma se po vunjke, kak i saki dan. Negda se, po sela, se pririhtalje kaj se tie dan, če se i nie išlje nekam na prščenje svetkuvalje. Za blage se prvi dan po koruza podžela koštreva i porezale smetljive betieve, doneslje h košu dima kaj bi se blage imelje h ščem nahraniti i na pašu ž njim išle same tuljike kaj bi se malje sprešlje. Prvi se bi dan nakosale za svinje buč i dračinja kaj siročke nej zvonile po kosaljke. Žrvnji su bilji takaj tihe jer se prie namljelje koruze i šenice za živinu i pečenje. Na Veljiku Mešu navieke se i boljše jelje. Zaklalje se prvi dan ilji rane hjutre živinče, spekla se gibenica, štruklji, alji kake je bilje vrieme buč, i bučnica. Hjutre, ščem se zdiglje si su se hmilji, muži podbrilji, obljiekla se friška obljeka kaj se čiste dočakal i svetkuval svetek. Poslji teri su se moralji delati oko blaga i živine, kuhanje obroka i pecilje delalje se stiha i z volju. Nie se mogla čujti ni srda ni kletva. Bil je te Veljiki svetek. Na tie dan su babe delale mladi kvas. Unda se nie hodilje h štacun po kvas. On se je delal doma. H lončeku ilji h tenieru pomiešalje se malje melje z vodu i delje nekam h kmicu. Za dan-dva, te bi se napuhnulje i z takvem domačem kvasem omiesil bi se kruh. Od omiešenoga kruha saki put se spravil komaček sirovuga kruheka. On je bil kak kvas za novi kruh. I tak je te išlje se čez cielje ljete dok se nie na saku Veljiku Mešu napravil novi kvas. Ljudi su se raduvalji če je na Veljiku Mešu i poklje nje bilje ljiepe, sunčane i toplje vrieme. Znalji su i reklji da če do Veljike Meše ne tuče, poklje toga svetka več ne curela, pak su odehnulji. Iste tak su reklji da poklje prvuga diežda teri curi poklje Veljike Meše, dojdeju megle i jesen ropa na vraca.

Dosta se toga pozabilje, pune se toga zmenilje. Nu raduje sakuga onuga teromu nekaj znači Veljika Meša, da one kaj se nie zmenilje i ostalje je do dien denes, a te su pesme ljudi tere buju zvonile po naša cirkvica, z radošču h srcu, morti i teru suzu, alji ne za hdien:

…Čuj nas Majko, nado naša, k tebi vapimo mi svi, svak Ti srca sad iznaša, srca puna ljubavi. Primi, primi mila Majko, naša srdašca to je sve što mogu dati tvoja djetešca…

http://www.zagorje.com