Pregled tisKAJna
Varaždinske vesti, br. 3532, 11.09. 2012.
Piše Barica Pahič
KAJ je naše pitanje i naš odgovor
Pesnik koji je samoču iskal na Varaždinbregu, med trsjem
Zakaj bregi i gorice?
To me zmislilo na našega varaždinskoga pesnika Zvonka Milkovića, šteremu je naskorem oblietnica rođenja, a šteri je i sam na Varaždinbregu puno ophajal gorice i na fnogi put se tu nadahnul za svoje popefke. Varaždinci mu duguju zahvalnost, nie same radi pesničkoga delovanja, neg i književne zaostavštine šteru je poklonil naše gradske knjižnice.
Vrieme branja grozdja je došlo i prešlo, ali Varaždinu okolni bregi niesu još zamukli. Još se diela, nadgledavlje kak se mošt bučka v lagvi i obavljaju zadnji posli prie nek se se zmiri v očekivanju da nam jesenski dežđi natopiju, a sniegi zabieljiju zemljicu onak kak je o tem popeval D. Domjanić v popefki “Kesni sneg”: “… dragi beli snežek, tiho padaj kak da dragaš…”
Morti se šteri čitatelj vezda pita kaj mi je došlo i kakve veze ima takev začetek ovega teksta (osim citierane pesme) z oniem kaj bi se trebalo najti vu njem. Zakaj bregi i gorice?
Ima, ima! Se to me zmislilo na našega varaždinskoga pesnika Zvonka Milkovića, šteremu je naskorem oblietnica rođenja, a šteri je i sam na Varaždinbregu puno ophajal gorice i na fnogi put se tu nadahnul za svoje popefke. Varaždinci mu duguju zahvalnost, nie same radi pesničkoga delovanja, neg i književne zaostavštine šteru je poklonil naše gradske knjižnice.
Matica hrvatska, Varaždinsko književno društvo i Gradska knjižnica “Metel Ožegović” pripremaju obilježavanje njegvog rođendana. Predavanje o pesniku bu imal mr. Ernest Fišer, šteri je 2004. leta pripremil i vun dal Milkovićeve “Pjesme samotnika” i najpozvaniji je o njem govoriti zate kaj je najglipše zaronil v njegvo pesničko stvaranje. A poštovatelji književne rieči i oni šteri bi šteli odati ovolietnu počast našem pesniku, nek dojdu na proslavu. Obavest bu jim još došla.
O tem pesniku, najbolj poznatom varaždinskom književniku i predstavniku varaždinske književnosti z doba moderne, šteri je bil uvršten i v poznatu antologiju “Hrvatska mlada lirika”, pisali su i fnogi drugi književni stručnjaki i kritičari. Zadnji od njih je dr. Joža Skok, šteri je o Milkoviću napravil opširni prikaz v “Garestinskom hortusu verbu”.
Poštovatelje pesništva bumo zmislili na to da je Zvonko Milković rođeni Varaždinec. Rodil se 1. listopada 1888. leta, a i vumrl je vu Varaždinu 1. ožujka 1978. leta. Objavil je ili vun dal zbirke popefki; Pjesme, Pobožni časovi, Legende o sakritoj sreći i putopis Krenimo u rano jutro . I pokle njegve smrti mu je tiskano nekaj knjig. Maker je pretežito pisal književnim standardom, ima i kajkafskih popefki. Varaždin mu je, kak to veli prof Skok, bil “ biografsko, motivsko, emotivno- psihološko i kulturološko ishodište i utočište”. To je pesnik “intime, tišine i samoće”, koju je iskal i na Varaždinbregu, med trsjem i med ljudmi šteri su v goricami delali. Zate za kraj nek bu njegva pesma.
Jesensko kopanje
Od zaran, od zaran
Kopamo več celi dan
Celi božji dan.
-Pazite na trsje!
Giba se, prigiba se,
Gdo ni jak dost, ziba se,
Več diši po snegu.
Od zaran, od zaran
Kopamo več celi dan-
Vetrek, vetrek kaj se sipleš?
Po prstima tin as ščipleš,
Od zaran, od zaran –
– Ajda, ajda!dugi žlak,
Z motikami podjednak,
Giba se po bregu…
Zvir:
http://varazdinske-vijesti.hr/kaj-je-nase-pitanje-i-nas-odgovor/pesnik-koji-je-samocu-iskal-na-varazdinbregu-med-trsjem.html
Ov put članka nema v papernatomu vundajnuVV-a:
http://varazdinske-vijesti.hr/pdf/3534.pdf
* * * * * * * * * * * * * * * * * * * * * * * * * * * * * *
Kmeti – Tam po bregu mi je trsje, 02:40
http://www.youtube.com/watch?v=xzbnw2c4mk8
