Došel bum v Bistricu – Josip Ozimec
Povodum 790. obletnice spomena imena Bistrica (leta 1999.) zgruntan je duhovno-refleksivni Recital prepoznatlivoga kulturnoga identiteta mesta Marija Bistrica čez ime antologijskoga kajkavskoga pesnika Josipa Ozimca.
Ov recital je prerasel v tradicionalnu kulturno-kniževnu manifestaciju, tera se održava krajom listopada, a sudeluju autori z cele Hrvatske.
Obrađuje duhovno-refleksivnu tematiku, neguje moderni pesnički izričaj, suživlavanje z Bogom, Marijum, prirodum i bližnemi. Neguje pesnički izričaj teromu je v prvomu planu nuterna struktura, bogatstvo slik i misli z znatnem refleksivnem misaonem nabojom.
Združuje pesme v trem kniževnojezičnem kategorijam: kajkavske, čakavske i štokavske, v bogatstvu različitosti hrvatskoga trojezičnoga bitja. Recital je natecatelskoga karaktera ter se sukladno tomu dodeluju po tri nagrade za svaki jezični izričaj a zebrane pjesme za interpreterajne na zaklučne svečanosti ocejnuje i publika.
Saki recital prati i tiskani Zbornik v teroga vujdu pesme zebrane od stručnoga ocejnivačkoga suda. Održani su i okrugli stoli o duhovno-refleksivne tematike, a v sklopu manifestacije održavaju se i prigodne etnografske izložbe (očuvane starine bistričkoga kraja, tradicionalni bistrički suveneri i sl.). Sama večer recitala odvija se krajom listopada, pred Nedelu Zafalnicu, gda v Marije Bistrice službeno okončava sezona hodočašča.
Zvir:
http://www.rmb.hr/index.php?kat=recitali&podkat=josip_ozimec
* * * * * * * * * * * * * * * * * * * * * * * * * * * *
Josip Ozimec
MOJA BISTRICA
V zime je Bistrica
najlepša razglednica.
V letu –
gda traje pruščejne –
šara je Bistrica
kak šara poculica…
V letu je Bistrica
douga kikla –
štandi –
kipci –
kalvarija i cierkva…
Bistrica je
raspele –
barjaki i
krunica.
V jesen – muokru
v meglu skrivena –
Bistrica moja
sama – puspana
čaka lete
i ruomare –
mučeča –
čista – uprana.
________________________________________________________
pruščejne –proštenje (hodočašće), šara –šarena, douga –dugačka,
poculica –šareni ukras na glavi žena iz ravničarskih krajeva Hrvatske,
kikla –haljina, kipci –mali kipovi svetaca (suverniri iz Bistrice),
čaka lete –čeka ljeto, ruomari –hodočasnici, mučeča –šutljiva (tiha)
Zvir:
str. 5 sim
http://de.scribd.com/doc/23627954/2/SJE%C4%86ANJE-NA-PJESNIKA-JOSIPA-OZIMCA
* * * * * * * * * * * * * * * * * * * * * * * * * * * *
Božica Pažur
(Podgorje Bistričko, 1934. – Marija Bistrica, 1981.)
Josip Ozimec još jen je z nepravom pozableni avutor – bi rekli vukratko – prateč inerciju toga dvojnoga pozablejna, i to od vuobičajene kritičarske marginalizacije spram kajkavskoga stvaralaštva do činenice avutorove nagle smrti pre dvadesetek let.
Z denešnoga stajališča, daklem – po 20. obletnice smrti, 25 let po vundajnu prve kajkavske zbirke “Još sme tu” (ali i posle 25 let marginalizacije) – podsečamo na odrednice prezišle z Ozimčove kajkavske pesničke samozatajnosti tere znače više od književnopovesnoga podatka: vuvrščejne v Panoramu novešoga kajkavskoga pesništva (Kaj 1, 1971.), v Antologiju noveše kajkavske lirike prireditela Mladena Kuzmanoviča (Kaj 3-5,1975.); nesporen poetski vupliv na druge avutore.
Kak je v životopisne bileške spomenute antologije povedal Mladen Kuzmanovič, Josip Ozimec “kajkavsku poeziju piše dost dugo (štokavsku, medtem, vundavle) i tek leta 1970. počimlu v časopisu Kaj zlaziti negve prve pesme na kajkavščine”.
Bilingvalnoga, znači, jezično-umetničkoga opredelejna, Ozimec se 70-te let 20. stoletja – označenem vuspešnem početkom revitalizacije kajkavskoga pesništva – nenametlivum pesničkum osobnostju priklajna pokretu suvremene kajkavske literature.
Maker Ozimčov kajkavski poetski opus, jednostavno, ne stigel doživeti kniževno-kritičku ocenu – nit je bil razmatran nuter onodobne strukturno-tipološke zvrstavajni poput semantičkoga shematizma il semantičkoga sintetizma, poezije “novoga izraza”, naprimer, il poezije zavičajnoga idioma – važno je des zteknuti nekuliko odrednic / klic negve neosporne suvremenosti: egzistencijalistični svetonazor skazan odmikajnem od antropocentrične slike sveta, i to osobnem, specifičnem, fenomenom poetske animalistike, občenito, kritičko-analitički nedovolno aktualiziranem v suvremenomu hrvatskomu pesništvu; razdroblenost, razbijenost strukture stiha tera kulminera osebujnem”trotočjem”: skoro, gubitkom, izostankom teksta kak mogučnostju tvorbenovoga značejna i nove osečajnosti – signirajnem prostora onostranosti i zaumnosti.
Zavuzimajne za stvarjalačke mogučnosti i dignitet kajkavskoga jezika Josip Ozimec povrđival je i nuter Vuredništva časopisa Kaj čiji je član bil od leta 1975. do 1981.
Zvir:
str. 7 sim
http://de.scribd.com/doc/23627954/2/SJE%C4%86ANJE-NA-PJESNIKA-JOSIPA-OZIMCA
* * * * * * * * * * * * * * * * * * * * * * * * * * * *
Limena glazba Lovro Ježek Marija Bistrica Tri su dekle, 07:14
