prof. Željko Funda

Važno je Kaj pivo

(Ova priča je fikcijska nadopunitva zgoda kaj se pripetil v Svetomu Ivanu Zelini 2007. v prigode okrugloga stola na temu Kajkavski spomejnek.)

Zgovarajuči vsaki Č i Ć kot stoodstotna Bosanka, Jelča je kruto zpametno štokala o kajkavski emirati, potreboče emancipacije i revitalizacije Kaja, o reči materinske kak materi jezika. Gda je rekla biti nam je što jesmo, dakle, čuvati i njegovati svoj identitet, ja sem pukel. A kaj ne bi zato morali kajkavski govoriti? Kaj nam to ne naša bit? Kaj ga govoreči ne čuvame i pestujeme? Kaj ne bi zato morali i spikati i šprehati kajkavski? – U službenoj prilici koristi se službeni jezik, kolega, rekla mi je Jelča. Unda mi ovde traflame cajt če je tak. Ja vas šče jenkrat pozivam da kajkame. Šinja, Kutni, Riba, Marča, Hlebinec, Petrek, Lajninski, Božurka, same kukme kajkavskega vitiznanstva, kaj su sedeli v dvorane, mučali su. Pol ih je v pod gledele. Ja sem čakal. Več je hasni od jedne pive neg od superintelektualnoga štokanja o Kaju. Pozivam one koteri tak misliju da z menum odidu na jenu kriglu.
Nigdo se ni zdigel. Pazite mi na Č i Ć, rekel sem i odišel. Bil sem čemeren. Znovič se ponovilo ladolažje kajkavskeh intelektualcov. Govoriju kak se šika, zameriti se ni svoje tenje ne bi, reč materinska od nijene kune nijenomu ne vrednejša, Marko Marulić bi tak lepo na persi visel. Odišel sem na najbližejšu terasu. Komaj sem čakal da zperem nekaj čemernosti z sebe. Gda je došlo, z velkim žmahom sem poserknul pivo. Lestor malo je bilo ležejše. Ni potlam drugoga guta ne puno bolše bilo.

Je, je, je. Ljudi su ti bedačeci, vekši od mene. Znaju getribu, znaju nogomet, al ne znaju živeti po tvomu. Znaju avion peljati, al bogčeci ne znaju kormaniti ze svojem žitkom. Zato ti se ja za njeh molim i zato ti dojdem na mešu. Grešni jesu, al v ovemu svetu se nemre ni hoditi prez greha, kamkoli delati il govoriti. – Zpod terase pokazal se drobni stari človek kaj se glasno z sebum zpominal mašuči z rukami. Cipeliši su mu bili barem dva broja prevelki. Glava mu je bila plešiva, lice gliboko zbrazdano. Bil je v čiste obleke, al stare i znucane. Polak nezpadneh farb i mustri rekel bi da je vse dobil v Caritasu. Vsak čas je na kratko zestal ter pošel dalše. Šče jen mudrijaš, pomislil sem. Nu, kak je lepo po domače govoril, ja sem napel vuha da ga bolše čujem. Ovo je bil lek od štokavske palamude, kaj mi je v temu času največ trebal. – Evo, ve ti se mam molim za te človečje bedačece. – Deda je zestal, zklopim ruke na persi, nagnul glavu ter se zadervenil. – Je li ovo Jurča il suho drevo? rekel je mlajši človek kaj je došel do njega ter ga z perstom dopetnul. Ov je ostal miren. Gda ga je čversto porinul, Jurča je opal na asfalt. – Kaj se ne javiš? veli mu mlajši človek smijuči se ter mu pomore zdiči se. – Molim se, reče mu Jurča. – Za vsakojake pizdeke moreš, za me pak ne. – Ja se molim za vse ljude. Če si jen, i za te se molim. – Zakaj unda ja šče plaču nes dobil? Tri meseca! Zakaj? – Zgledi da se nes dosta molil. Ve ti idem k meši pa bum. Lestor za te i za tvoju plaču, rekel je Jurča pomirljivo. – Nej se moliti. – Zakaj? – Bog te ne posluhne. Pre nam bu gazda plaču dal če dobi na lotu neg da ga Bog na to nagovori. – Morem se ja moliti da on dobi na lotu! – Zakaj ja ne bi dobil na lotu, konj nepotkovani? – Jer mi nesi rekel. – Ve ti velim. – Unda bum. Časna reč. – Daj. Čversto, segurno, mužki. Kot direktor. – Šališ se. –  Kaj unda? – Nič. – Dobro. Stari osel na goli posel! rekel je mlajši človek ter dal Jurči z nogum v rit. – Moli se da se kadi! – Bum, Slavek. Časna reč.

Slavek je odišel na jenu stranu, Jurča proti cirkve. Ni sam ne znajuči zakaj, ja sem pošel za njim. Gda sem mu se približil, on je vre glasno govoril. Je, je, je. Sam vidiš kak su ti ljudeki nerazmeni. Ve bi jeno pa bi drugo, a more i treče. Deca su ti navek deca. Svet ti je prevabljiv ter ti se zato nemreju odlučiti. Lepo spati, fino vino, lepi auti, fine klobase, lepa obleka, fino ležati, lepi đunđi, fina orehnjača, lepo cvetje, fina mužika. Ve ti budi pošten. Z vsakoga hipa nekaj vabi. Gda se išče kotera reč oglasi, tente na brege. Okružiju te kot pesi ježa i ve ti budi jež. Igle imaš, al i iti moraš nekam. Če nikam drugam, bar na šekret. Šalim se. Mam ti zato zmolim jen Očenaš. – Jurča se zestavil na pločniku, zklopil ruke na persi i zaferfuljil. Ljudi su hodili poleg njega, auti jurili na meter od njega. Tu i tam negdo bi mu kakov špot il uvredek dohitil. Njega to ni najmenje ne dopetavalo. Bil  je miren kot kip. Gda se genul i zakoračil da prejde cestu, zacvilele su gume i jen auto se zestavil malo pred njim. – Idiote blesavi! Gledaj kuda hodaš! – zakričal je šofer mercedesa. – Prosim vas da mi oprostiju,rekel mu je Jurča ponizno. – Starački ti je ispod brijega! – rekel je šofer i odjuril.

Stal sem nekaj metrov podalše. Nesem znal kaj bi naredil. Štel sem mu pomoči da preide cestu, al mi se nekak veđalo. Staroga človeka se ne patronizera. Jurča je odišel do verha gde je cesta zavijala i tu ju je po zebre prešel. Predi se punokrat ogledal levo i desno da vidi je li koteri auto prihaja. Ja sem za njim hodil kot telček. To je bilo stokrat pametnejše neg poslušati lažoladne kajofilce kak štokaviju o dragom si Kaju. Ja te ljude nikak ne razmem. Znam da radi imaju reč materinsku, znaju i dobru kajkavsku vitiju napisati, al če je reči nekaj na kajkavskomu, njemi je to «deplaserano», «zforserano», «teatralno», tijam nehorvatski. Istočasno vsi bi oni Kaj oživljavali i oslobađali, njegovu renesansu prizivali, nekakov antiilirizem. V naslednemu hipu ja sem bil na asfaltu.

Skoro sam te zgazio, budalo! – kričal je šofer na me z auta koteri me zrušil. – Zebra ti je, gledaj, tamo.

Ja sem se polehko zdigel. Posreče, nič mi ne bilo. Šofer je, zgledi, to mam razmel ter je odjuril, obišelši me. Vuzput me preklel.

Gospon, jeste dobro?rekel je Jurča došelši do mene. – Zgledi. Zgledi,rekel sem gledajuči zebru na dva metra od nas. – Ja vas prepeljam prek ceste, rekel mi je Jurča. Prijel me za ruku i odvlekel na drugu stran. Nejte mu preveč zameriti. Posel ga tira, žena, obveza il morti, siromak, mora reč obderžati. Nigdo ne juri če ga huda sila ne natirava. Glava v torbe, a torba pišljiva. Ja sem šče bil v šoku. Nič nes mogel reči. Najbolše da vi z menum odidete k meši. I mene je skoro auto zgazil. Mogli bi se zkupa Bogu zafaliti kaj sme živi ostali. – I za šofere pomoliti? rekel sem dohajajuči k sebi. Se razme. Hudo jureči, oni vam glavu v torbe imaju. A torba pišljiva. – A če pak nekoga zgaziju? – Unda ponajveč našu molitvu trebaju. – Zgaženec pak ne? – I on, al za njega bu njegova družina i prijatelji molili. Krivec vam je navek natentan na greh. – Od koga? Sebe samoga? – Od  prelepoga sveta. To vam je najvekša tenta. – Unda je Bog za vse kriv. – Tak zgledi, al neje. – Neg kak? – Jaj, ne znam. Zato vam se ja puno za vse molim. Morti razmem, a morti Bog preveč ne zameri. Kaj vi velite? – Ni ja ne razmem. – Unda je zbilja najbolše da mi k meši odideme. Morti razmeme. – A pivo? Da odideme zkupa na pivo? – Jaj, velka tenta, gospon. Velka tenta. Prevelka. – Hej, bog, Žec! rekel je negdo iza mene tresnulši me odostraga po ramenu. Ja sem se obernul. Bil je to pajdaš Zvonko, poznati kajkavski vitiznanec ze Zagreba. Baš dobro što sam te našao. Ja zakasnio na okrugli stol pa se već pola sata motam po Zelini. Uostalom, što da slušam cendranje i prenemaganje. Krokodilskih suza na hektolitre. Hajdemo mi radije na pivo. Usput promatrati zgodne mačke, puštati sline i gladiti brkove. Što kažeš? – Pa …, rekel sem zmislilši se Jurče. Medtemtoga, on je vre odhajal proti cirkve. Hajdemo. Žedan sam ko pustinja. – I ja. – Odlično. Kako bi rekao Ujević, žedno kamenje na studencu. – Rekel si ko pustinja. – Nije važno. Važno je pivo. Kaj, recimo. Dobro, a jeftino.

* * * * * * * * * * * * * * * * * * * * * * * * * * * * * * * * * * * * * * * *

Na ovomu svetu samo prememba, (kontra i) pro-mena stalna je:

Vijenac / Godište XIX  / broj 464-465  / 15. prosinca 2011.

Razgovor
BOŽICA JELUŠIĆ, KNJIŽEVNICA

Kajkavski postoji kao jezik, a ne kao dijalekt 
Jezični unitarizam jednako je opasan kao i politički

http://www.forumgorica.com/kajkavski/hrvacki-trojezicni-pluralizem-ili-sto-jenoumle/msg45843/#msg45843

Zadruga – Kaj buš ti, bum i ja, 04:39