TUROPOLJSKO JURJEVO 2011.

Tekst: Slavko Stepanič

Turopolci su opet proslavili dolazek proleča, kak to več delaju nekuliko iladi let. Čudno, kak to negdo ima tak dugu tradiciju. Ali za one teri to prate ni niš novoga.

Još negda dok Turopolci nisu došli ovdek de denes živimu, v svoje pradomovine v Bele Polske slavili su dolazek proleča v čast svemu bogu Jarilu, negve sestre Morane i nijovom ocu Perunu. Ali kak su naši stari došli ovdek v Turopole, zeli su krščanstvo koj novu veru i morali su pozabiti svoje bogove. Onda su za zaštitnika proleča zeli svetoga Juraja.
I ot onda se to sako leto slavi 23. travna, a večer prije toga se pale kresi po se sele.
Ta tradicija pomalo izumire ali su pret 18 let plemeniti Turopolci i nijova udruga Plemenita opčina to zeli prek sebe.

Tak je bilo i ovo leto, najprije se išlo na Odru k meše, jer tam je cirkva svetoga Juraja.
Došel je i turopolski komeš Franc plemeniti Kos, inače plemenski Mraclinec, a žnjem i Turopolski banderij a došle su i stare rvacke postrojbe z: Bakra, Dubrovnika, Kostela i Karlovca a z Križevcof je došla Djevojačka straža.
Dotlek, dotlek dok je meša trajala na Odre, pri gradu Lukafcu bila je izložba kojnof Rvacki posavec.

Popoldan je bilo narodno slavlje oko grada Lukafca, de je pokazana Turopolska baština i kultura, bilo je tu kojnske zaprege, folklora, stare zanatof, uzgajivače male životijne. Dopelali su čak i turopolsku prasicu s pajceki, pak se deca bar mogla videti kak zgledaju pajceki. Bilo je jako puno ludi, kaj još ni bilo do sat, a neki šacaju da je bilo četiri ilade.
Oko turna Lukavca grada bila je zavezana velika podgutnica, simbol Turopola još ot napoleonske danof, kat su naši dečki išli v francuske vojake. Francuzom se dopala ta podgutnica, pak su ju stilizirali i nastala je denešna kravata.

Tu su bili i nezaobilazni političari i v nijovu čast moral je pucati trupolski štuk (top).

Kat se počel spuščati mrak onda su se sve postrojbe postrojile a kapetan turopolskog banderija zapalil kresa, po stare navade.

Posle toga bilo je narodno slavlje vuz grupu Sjaj, nekteri veruju da su z ognom otišla sva zla tera nas muče i da bude bole.

Ja pak verujem da kat su svi otišli ot Lukafca grada, da su vile mogle zatancati svoj tanec v tišine noči, ak je još do zalutal onda mu je Divli ogen posvetlil da mora videti kut se ide domom. Šteta kaj nisu dopelali i krave, kaj bi i nem deli venca oko vrat, pak bi skakale prek ogna. Do zna, most bu i toga kletu?

Zvir:
http://www.turopolje.hr/JurjevoH.html

* * * * *

Vide(l)o
AD 2009: Lukavec Jurjevo, 03:34