Pregled tisKAJna
Međimurske novine, 2012-04-19
Premišlavanje Jožeka radnika
Gorčanski HRAST vam je jako čudno drevo
Biračko telo Gorčana je Hrasto dalo dva večnika. I ve počnejo muke po Hrasto jerbo gda so se prebrojili glasi i skubicireli izborni rezultati zazvedilo se gda gorčanska levica na čelu z načelnikom Moharičom, šteri je i zakuhal gorčansko političko krizo, ima 6 večnikov, a gorčanska desnica, štero vodi gorčanski hadeze 7 večnikov. Tak vam je to zgledalo prve dneve posle minulih izvanrednih izborov. A unda je počela politička trgovina. Vsi znamo gda lanec poči tam gde mo je nejslabeša karika, tak je bilo vu Gorčano jerbo je gorčanski načelnik i esdepeov sabornik procjenil gda bi to mogel biti Hrast i gospon Katanec. I neje se prevaril. Makar znamo gda se članovi Hrast ne bavijo „političkom trgovinom“, ali so se prodali i prešli so z desne strane na levo. I to brez žmigavca.
Piše: Jožek radnik
Lani se na našoj političkoj pozornici pojavila nova stranka Hrast, štera je mela na pameti kaj spremeni vse ono vu našoj hrvaškoj politiki kaj je nej valjalo. Pod Hrastom so se skupljali vsi oni šteri so meli poštene namjere, vsi oni šteri so, do fčera, nej bili spremazani vsemaj političkaj maščaj, vsi pošteni šteri so nej gledali sam svoje interese, vsi oni šterima so humanistička i krščanska načela bila na pameti. Vu prvomo listeko, šteroga je Hrast, unda još kak pokret vu političkaj pelenaj štampal, je pisalo: U Hrastu je nemoguća „politička trgovina“ jerbo liste sastavljaju birači… Niti je leto dni nej minulo i več se Hrast poškliznul i vse ono kaj so hrastači govorili je palo vu tibro na prvomo ispito šteroga so polagali. Najme kaj, znamo gda so Hrastači nej dobili povereje biračkoga tela niti na izboraj za varaždinskoga gradonačelnika, a niti pak so prešli praga na izboraj za sabornike, ali so zato čuda bole prešli na lokalnaj izboraj vu našemo međimorskomo Gorčano. Biračko telo Gorčana je Hrasto dalo dva večnika. I ve počnejo muke po Hrasto jerbo gda so se prebrojili glasi i skubicireli izborni rezultati zazvedilo se gda gorčanska levica na čelu z načelnikom Moharičom, šteri je i zakuhal gorčansko političko krizo, ima 6 večnikov, a gorčanska desnica, štero vodi gorčanski hadeze 7 večnikov. Tak vam je to zgledalo prve dneve posle minulih izvanrednih izborov. A unda je počela politička trgovina. Vsi znamo gda lanec poči tam gde mo je nejslabeša karika, tak je bilo vu Gorčano jerbo je gorčanski načelnik i esdepeov sabornik procjenil gda bi to mogel biti Hrast i gospon Katanec. I neje se prevaril. Makar znamo gda se članovi Hrast ne bavijo „političkom trgovinom“, ali so se prodali i prešli so z desne strane na levo. I to brez žmigavca. Ne bi vam znal reči kaj na to veli jivo biraćko telo, štero so prevarili jerbo da so Gorčanci šteli dati svojega glasa esdepeovcima ne bi zaokružili hrastače. Vidite kak to zide gda mladi odgovorni i nekorumperani političari brez svojih osobnih interesov spremenijo strano sam zato kaj bi mladi Robi Katanec zutra bil ravnatelj škole jerbo mo to sabornik Moharič more zrihtati. Tak se bar po Gorčano prepoveda. No, kaj ne bi vi mislili gda je to jegov osobni interes, nej to je interes sela, interes župe i gorčanskih đakov i zato ne razmem kak so to nej prepoznali ovi desni gorčanski političari, šteri se ve fujijo na Robija i kunejo mo vse po spisko. Morete si misliti kajkaj vsega se dragi Božek pšak naposlušal. Brzčas oni imajo nekaj protiv načelnika i sabornika Mohariča, šteri je vu zadjih štriri-pet let uspel posvaditi celo selo. Ali mladi Hrasta to ne znajo, jerbo so stopram fčera dojšli vu politiko. I zato so Moharičo dali još jedno šanso. A niti pak se ravnatelj škole ne zbira vsako leto, pak tre zeti dok se nudi. Železo se kuje dok je vroče. A što se još gda i gde brigal za to kaj je štelo biračko telo dok je svoje glasa dala Hrasto? Najgerek sam kak bode dale shajal Hrast gda je na prvomo ispito opal i gda se raspočil čim so mo pokazali cugle vlasti. Tak delajo te mladi, odgovorni, pošteni i neopterečeni katolički političari. Ili pak smo vsi, ipak, črleni pod kožom? Najgerek sam kak bode to, itak, na vse zadje zišlo, jerbo što z vragom tikve sadi…!!!
Mađari, nej vsi sam nešterni, bi šteli kaj bi Međimorje znova bilo jivo. Nigdar nebrejo zabiti kak jim je bilo lejpo gda so se špancerali i šepurili po Međimorjo kak gazdi i gda so hasnuvali vse one dobrote i finote štere je dragi Božek dal nam na ovomo našemo falačeco zemle med dvemi vodami. Još bi razmel gda bi Mađerke znova štele kajbi mi Međimorci bili jivi, očem reči, kajbi one znova bile naše, kak je to bilo pre sto let, jerbo još navek nebrejo pozabiti kaj so jim jive mamice prepovedale kak je lejpo bilo deliti živleje z frčnim, drčnim i dobrim međimorskim težakima. Mađerke so nej mogle nikak pozabiti Međimorce jerbo so tu zazvedile kaj je to globoko oranje. No, nebrem nikak razmeti zakaj se naš župan Ivek mam uzjogunil čim je šakica mladih Mađarov, posle par flaši tokajca, privatizerala Međimorje kak jiv hatar. Pak i mi Međimorci kajkaj toga prepovedamo posle sedme flaše graševine. Tak, napriliko, i ja sebe primem vu miseli kak bi štel gda bi mi žena furt mela 25 let, jerbo bi mi bilo topleše vu posteli i mejepot bi se hodal gret vu krčmo k Juliki i Štefici. Ali nikaj od toga, makar bi ja to jako štel. Tak bi i Mađari šteli. No, brzčas, so vidli kak mi mlačno slavimo 9. januara, Spomen-den od gda smo odišli od Mađerki i 1919. leta se prepojili Lepoj našoj. Najme kaj, mi to tak slavimo kaj Mađari mislijo gda nam je žal kaj smo to naprajli, pak nam sam očejo pomoči kaj se vrnemo nazaj tam gde smo 1918. leta bili.
Prvih sto dni nove kukuriku Vlade je minulo. Nebrem reči gda se je nej nikaj spremenilo: pdv je odišel gori, cene benzina i nafte rasrejo iz minute v minuto, cene plina so eksploderale, a prvi potprecednik je najavil gda bode i struja podražila. Burze se punijo z težakima,a i zdraviče nam je vse dražeše ako očemo preživeti. Ali to je još nej vse, pak vsaki minister mora nekaj doprinesti vu kaso. No, kuliko čujem, tu se nebode postalo, jerbo tre toj krizi pokazati roge. Pak bodemo došli na to gda so oni, štere smo natirali, bili zlatni. A kaj moremo gda mi navek prekesno zazvedimo gda so vsi novi hujši
Vide(l)o:
KUD Goričan- Leto, Leto, 01:58