Vuz Den horvatske deržavnosti

Bogokmice
(Bogomraki)

VLADIMIR MALEKOVIČ
Bogokmice. Listi z ladajna
(Bogomraki. Pisma s ladanja)

Teksti v ove knige prvotno su tiskani pod naslovom “Listi z ladajna” (Pisma s ladanja) kak feljtoni v “Večernomu listu” od 8. ožujka 1991. do 5. studenoga 1993., a potlam v “Hrvatskomu rukopisu “od br. 1 (16. studenoga 1993.) do br. 7 (11. srpna 1994.). Avutor se je potpisival pseudonimom Adam Grabowski.

Obširneše:
http://www.exlibris.hr/malekovic_bogomraki2.htm
ili
http://www.forumgorica.com/kajkavski/pro(iliti)za-kajkavsku-p(r)oeziju/msg23557/#msg23557

SAMI VU KMICI
 
                                                                          28. ivanščaka 1991.

Vezda je Horvatska deklarirala svoju neovisnost. Na den 25. ivanščaka 1991. Vu nekterih kotrigah mam su serpski žoldoši horvatsku deržavnost potirati počeli.

Ljudstvo strelati, hiže žgati.

Al orsag horvatski skazuje još navek svoju batrivost.

Zmenkava nam jedino mednarodno preufanje.

Nekterimi vse ovo zgledi kak libertas immoderata. Prekoredna sloboščina.

Europljani previđaju ono kaj je neprevidno: kak narod biva narodom po jeziku, navadami i i po hotenju k svojemu historijskom živlenju vu svom arealu orsačkom.

Tak je bilo s drugimi narodi, tak bu i z nami!

Z ladanja gledano, zgledi neveruvano. Amerikaneri legitimavaju jugoderžavu kotera je, pravzaprav, eksleks!

Prosim vas najponiznejše, ekscelencije stranske, kakav je to orsag koteri nema zapovedi postavitela iliti komandanta verhovnog?

A armije maršeraju na Horvatsku i na Kranjsku deželu. Anda i na vaše meje?

Bumo konkluduvali, gospodo: vi podpirate jen zapuščen orsag. Horida regio.

Zverh toga, vi ne merite jednakim metrom demokraciju pri nas i doma, i nemre se povedati da ste brezpristrani. Vi bi demokraciju protežirali vu centralizuvanom jugoorsagu. Prosim vas fino: čijom pomočju? Komunarskog režima vu Belgradu? Pak nismo, spoštuvani, vsi norci!

Ni za veruvati da vi nemrete veruvati da se neovisnost vu Horvatskoj i Sloveniji zazbilja dogodila.

Kaj za vas pri zdravim okima i vuhima, drugi svedočiju?

Mi Horvati neovisnost nismo pridobili Božjom providnošču, neg vekivečnim bojom z našim nenavidnicimi. A vezda smo ju okrepili na demokratskim zahodnim navadama, na referendumu i vu narodnom zastupničtvu.

Pak kad smo vre pri tom pitanju (Quomodo?), hotel bi vam reči, da je naša demokracija nekaj starejša od, primera radi, unioamerikanske. Jezero let vu našim historijskim listinami zacrtana je ona predivnim imenimi nami navek na sercu: congregatio, synodus, conventus, concilium, curia, sabor, etc.

Vu tom deržavljanskom nazivoslovlju verifikuvano je vse kaj se ovih dnevov zgodilo: glede poviestnog dostojanstva Horvati se nemaju čega sramiti pred drugimi europskimi civiliziranimi narodi.

Zato vaše neznanstvo, gospodo mednarodni tolnačniki, nemre stajati na putu slobode orsaga horvatskoga!

Vuokoli nas su same peklenske germade, čerleni tabornjaci. Kamgod pogledaš, odvsud se nakažeju podzemalske sile, larfe črne!

Vre zdavna nam sunce ne izhaja na Iztoku. Nut ak je veruvati poglavitom Beckeru, moglo bi nam zajti i na Zahodu?

A kaj mi Horvati anda moremo, sami i vu kmici?

Baršunska svito europskih i vskikolikih legatuša, horvatski barjak je na horvatskoj hiži: mi slavimo naš historijski laudemium!

I jošče nas navek strelaju. Nego, pripazite da nemilostivnost jugounitarne pajdašije ne vsmeri cevi spram vas. Otih stran Europa i svet vre su jemput bili opoganjeni!

Medtemtoga zaglavljujem: Horvatska je zadnjih dnevov ivanščaka dobila ono kaj ju patri: neovisnost. Bude li pri vas, i drugih, pobudila nehotenje, scienim da stvari buju potekle  putimi   nevugodnimi.

Zaufati se je zato da je diškuršuš još izgleden, communis regni utilitis.

Vse drugo je harc. Kak doskrat na Balkanu, Europo.

* * * * * * * * * * * * * * * * * * * * * * * * * * * * * *

Dreletronic Mrak Mrak Crni Mrak, 04:05