Pregled tisKAJna
Varaždinske vesti, br. 3521, 2012-06-26
KAJ je naše pitanje i naš odgovor, naša duša i naša popevka
Na tapeti je naviek prosveta i školstvo
Prinas se prosveta z sakim ministrom znovič reformiera. Prosvetarima je od silnih reform več muka. Na tapeti je naviek prosveta i školstvo, a vučiteli navek slabo plačeni. Tvrdi se da se na mestu stoji, a od silnih reform nikakve koristi.
Piše: prof. Barica Pahič
Nekaj me vleče za jezik da se male vmiešam v prepucavanja vu vezi afere z testom državne mature i o tem kaj je se rekel i počinil naš novi minister prosvete i športa. Da morem napisati se kaj mislim, ni cieli “Varaždinec” mi ne bi bil dost. Zate ja te teme rajše prilazim male drukčeše.
Naime, vu povodu Dana hrvatske knjige bila sam pozvana na Dečji odjel varaždinske knjižnice gde sam trebala posluhnuti i prokomentierati ono kaj pišu dečica z osnovnih škol našega grada. Moram priznati da sam “ostala bez teksta” nad oniem kaj sam čula, pogotovo gda je jena mala pucica, cvrčkica z tak drobnim glasekom kak kakev mali ftiček, čitala svoj nastavak romana o Harryju Potteru. (Istina, kajkavskih tekstov ni bilo. To bu im došlo z lieti.
Najte misliti da je to fraza, ali prie ili pokle saki oseti “zov rodne grude” i zmisli se rieči z šterimi se ”od srca srcu šepeče”. Treba razmeti da dečica moraju nafčiti standardni jezik z šterim se sporazumevamo v celini naroda. A mene pa se to napelava na mišljenje da nie same da naviek imamo puno pametne i darovite dečice neg i puno odličnih vučitelov, v ovem slučaju vučiteljic, štere vlažu veliki trud i puno vremena da bi dečica svoju darovitost razvila i pokazala. Ne velim da nema i slabijih prosvetarov. A v koji struki jih nema? Ipak, radi njih nie pošteno reči da ciela struka ne valja. Prinas se prosveta z sakim ministrom znovič reformiera. Prosvetarima je od silnih reform več muka. Na tapeti je naviek prosveta i školstvo, a vučiteli navek slabo plačeni. Tvrdi se da se na mestu stoji, a od silnih reform nikakve koristi.
Pokle toga sam bila vu Vidovcu na predstavljanju knjige “Iskrice iz školskih klupa” naše poznate vučitelice, profesorice Ivanke Kunić štera je, poleg vnogih popevki, pripovetki, knjig o narodnoj baštini i tak dalje, napisala i dve stručne knjige o dečjem stvaralaštvu, a v ove zadnje pokazala i svoje uspehe v radu z vidovečkom decom šteru je dopeljala na vnoga natjecanja i do puno nagrada. V zadnje knjige je se te nagrađene tekstove dela na kup, a na kupu su bili I njeni negdašnji vučeniki, a neki su, vezda kak odrasli ljudi, i čitali svoje dečje pesmice na predstavljanju. Bila je to jake liepa svečanost na šteroj su Vidovčanci iskazali veliko priznanje i poštovanje svoji negdašnji vučiteljici.
Kaj z tiem hočem reči?
To, da naviek imamo darovite i marljive dece i darovitih i marljivih vučitelov. Pa kaj onda to v naše prosvete ne štima? A nekaj ne štima. Verujem da buju čitatelji sami zaključili zakaj tolika “povika na vuka, a lisice meso jedu”.
Za kraj sam zebrala popevku Ivanke Kunić z njene pesničke zbirke “Žejna duša”. Po te je popevke i ciela zbirka dobila ime.
Žejna duša
Praznimo kalež
svoje sudbine,
serčemo več z dna.
Duša nam je žejna
štučka preluknjena.
Svoje grehe smo spovedali
i molitve za pokoru zmolili.
Pred svetim oltarom
bogohulniki su nam hostiju
v glibuoku kmicu skrili.
Praznimo kalež
svoje sudbine,
v gliboke gluhe kmice.
Duša nam je žejna…
Priek sklopljenih rok merzlo zernje
Žalosne krunice.
Popievka, kak se vidi, je nie za nasmejavanje. Ali nam morti pomaže da spoznamo baš ono kaj nam je v duši skriveno i neizrečeno. Kie nekaj dobrega vu srcu nosi i oseča, razmel bu.
Zvir:
(str. 21)
http://varazdinske-vijesti.hr/pdf/3521.pdf
VG-BAND…BEND ZA SVADBE… JEZUŠ KRISTUŠ KAK SMO ŽEJNI.wmv…091/7235000, 0:30
Pijmo brati vince, 01:52
