Pregled tisKAJna

Varaždinske vesti

Piše: Barica Pahič

Bogactvo naše kajkavske rieči fascinieralo je i jenoga Krležu i se šterim je on uzor. Vu tem se narodno i pesničko govorenje sprepleču i nadopunjavljeju, a kajkavščina potvrđuje svoju žilavost jer nam čez pesničko govorenje snaži i okrepljuje dušu. Tak sam se nazaj našla na terenu naše duše i naše popefke i zmislila da je vrieme prectaviti još jeno ime z našega Varaždinskoga književnog društva.
Pa onda nek to bu Tomislav Ribić, šteri je dobre poznat varaždinske književne publike.

Maker mi je urednik z naslova ove rubrike zbrisal rieči poezija i duša, niesam na to pozabila. A na njih me zmislila jedna moja sugovornica vu jako ozbiljne rasprave o tem kak je i kak nam još bu s obzirom na se veče račune z šterimi nas saki dien obasipljeju z Elektre, Termoplina i Varkoma. A ni drugi naši opskrbljivači (ona je rekla izrabljivači, valjda ji se zareklo) neju ništ menj milosrdni. Od njejnog pitanja: Zakej nam je tak kak nam je i kaj nas bu još dočekale?, v glavi mi se, kak na ringišpilju, zavrtelo kaj pitanje i kaj odgovor.

Zamantalo me uzbuđenje, štero je nie pred mene dopeljalo sam zagorske breščece, hižice, gorice i kletičke, stezice i cveteke, več jezer put opevane na se moguče načine, neg i se raznoversne rieči z šterimi je to opisano i predstavljeno. A to bogactvo naše kajkavske rieči fascinieralo je i jenoga Krležu i se šterim je on uzor. Vu tem se narodno i pesničko govorenje sprepleču i nadopunjavljeju, a kajkavščina potvrđuje svoju žilavost jer nam čez pesničko govorenje snaži i okrepljuje dušu. Tak sam se nazaj našla na terenu naše duše i naše popefke i zmislila da je vrieme prectaviti još jeno ime z našega Varaždinskoga književnog društva.

Pa onda nek to bu Tomislav Ribić, šteri je dobre poznat varaždinske književne publike. Član je Društva od osnivanja i njegov precednik vu dva mandata, stalni suradnik Varaždinskoga književnog zbornika (tu i tam i njegov suurednik) i sudionik na natječajima kajkavske poezije, gdi je več dobil mnogobrojne nagrade. Objavil je tri samostalne zbirke popevki i jenu v zajednici s L. Derkač i A. Jarkom. On spada v postmodernistički naraštaj suvremenih kajkavskih pesnikov. Več sam jemput napisala da je v njegve poezije “stalno prisutna jedna iracionalna crta”, da mističnimi, mitološkimi i nadrealističnimi slikami prikazuje nakaznu sliku rasapa i sveopče izobličenosti svieta i da “njegov Pegaz bezobzirno tutnji kroz te izmaštane svjetove, sposoban gricnuti što od baroknih prijetećih propovijedi, što od ciničnog tamburanja Petrice Kerempuha, što od suvremenih fantastičnih svemirskih putovanja.” Njegve su popefke prilično pesimistične i nie baš ohrabrujuče. A Ribić je poznati i kak pesnik ne baš preveč romantičnoga erosa.

A ovde bu predstavljeno i nekaj čist malo od onoga kaj je napisal (To malo je radi prostora šteri mi je na raspolaganju.) Bilo mi je med njegvimi popefkami teške pronajti onu koja bi nas razveselila, pa sam čitateljem odlučila ponuditi njegva Odputovanja, zmed ostaloga i zate kaj je popefka kratka. A i ljubavna je i glasi:

Odputovanja
 
Pošiljaš mi ajngela z e-mailom
naj me čuvle vu nemirnim nočima
ima tvoje oči
i diši po medu i cimetu
skrivlem ga vu ladicama senja
i odpiram pred zorju
naj mi šepeče bajke o dalekim svetima
kaj ih nigda nemo odkrili
o ljubavi vu kuli od žada
o sedam pečata kaj sam ih
ostavil na tvoji koži
i otoku vu vesmiru
gdi se bumo zišli
na jednom od svojih odputovanja

Zvir:
http://varazdinske-vijesti.hr/kaj-je-nase-pitanje-i-nas-odgovor/pegaz-tutnji-kroz-izmastane-svjetove-kajkavske-popefke.html
i(l) str. 20. sim
http://varazdinske-vijesti.hr/pdf/3529.pdf

* * * * * * * * * * * * * * * * * *

Ziga & Zlatko Vitez – Oci Sokolove, 04:03

http://www.youtube.com/watch?v=XAYhy7vitfQ