Pregled tisKAJna

Međimurske novine,
e-vundato: 17.09.2012.

Premišlavanje Jožeka radnika

Sulejman nam je važneši od Zrinskoga!!!?

Piše: Jožek radnik

Ve smo pak znova, mi Međimorci, pokazali kuliko držimo do Mikloša Zrinskoga Sigeckoga. Najme kaj, vu minuli petek, sedmoga septembra, smo obslužavali 446.-to obljetnico kak so ga Turčini sfondali vu Sigeto. Jega i jegovih cirka pecto vojnikov. Verjem gda vam je poznato gda je Turčinov bilo čuda čuda vejč, a žnjimi je komanderal Sulejman Veličanstveni. No, ne bi znal kuliko vam je poznato gda je Sulejman hmrl istoga dneva gda je Mikloš poginul, ali so to Turčini skrili od svojih vojnikov. Ovo leto je bilo isto onak kak i pred 446. let pod Sigetom: Naših ljudi je bilo cirka okoli sto pre Svetoj Jeleni polek mauzoleja vu šteri so zakopali Mikloša Zrinskog, a par jezeri nas Međimorcov je gledalo serijo o Sulejmano Veličanstvenomo na televiziji. Navek so nam važneši stranjski, a svoje ne poštuvlemo i zamečemo makar je Čakovec Grad Zrinskih, a isto tak je i naša županija Županija Zrinskih. Vse je to lepo i dobro, ali so se v Sveto Jeleno došli pokloniti naši sosedi z Hungarije, a došla je i klapa Luka iz Ploča, ali Šenkovčarima je bilo predalko kaj bi došli jene vu drugo vulico. Dečki z Ploča so strašno lepo popevali, a bilo jiv još i lepše čuti, ali nešterni šterima to partija ne dopušča so nej vupali v cirkvo tak gda so domjenka počakali na nejbližešoj terasi. Nek jim bode žal, ali to popevanje je bil svetek za vuha, a brzčas se cirkva ne bi bila zaruhnula ak bi par nezerenušov nutri došlo.Em je nova, em je još pod garancijom! Vsi so mam v zrak skočili, na radio so furt ponavlali, a na televiziji vrteli gda se zazvedilo gda je naš precednik Vlade, a nezerenoš, Zoki Milanović, nekaj rekel kaj vu Bibliji piše. Dok se to malo bole i malo bliže pogledne unda se dojde do toga gda je nej vse to z Biblije nek sam malo vejč od pol. Najme kaj, Zoki je rekel: nek mi se posuši desnica ak pozabimo Slavonijo. A kaj reči na to? Moram vas pitati: A znate vi što je Zokijova desnica? Kak ne znate, pak opozicija, hadezeovci!?

Naši ministri Siniša Hajdaš Dončić i Gordan Maras so se odpelali vu Kino kak bi Kinezima ponudili vse ono dobro kaj jim Lejpa naša more ponuditi. Domačini so jiv lepo poslušali i na vse zadje so pitali kakša smo država i kuliko ga je nas Hrvatov? Minister Hajdaš je lepo otpovedal gda smo sredje razvijena zemlja i gda ga nas, po zadjemo popiso, nekaj vejč od štiri milijonov. Unda pak ga je domaći minister za trgovino malo čudno pogledal, pak mo je rekel: A zakaj ste unda nej vsi došli?

Najte me nikaj pitati zakaj, gde i što, ali otkak je minister Ranko Ostojić zebral Krunija Gosarića za novoga načelnika Međimorske policijske uprave i zmenil Iveka Sokača mam se počelo čuda vejč krasti. Prosim vas lejpo, najte me nikaj pitati!?

Mortik vam ja nemam praf, ali mi se nekak zdi gda naša Vlada ima dve politike: jedno za Jug Lejpe naše, a čistam drugo za Sever i Međimorje naše malo. Najme kaj, vse je več prepravleno kaj bode se delal Pelješki most samo još Evropa mora dati peneze. Probajte se zmisliti kak so esdepeovci bili protiv toga mosta i kak so pili krf na slamčico Jadranki dok so bili vu opoziciji, a ve čim so došli na vlast mam so se prijeli za tej most kak pijanec za plot. No, najte me krivo razmeti, nejsam ja protiv mosta, ali zakaj so ve naprajli hrmaka z Lesarovoga mosta na Muri pre Svetomo Martino. Most je tu, on dela, ali je zaprta meja i prijelaz vu Deželo. Verjem gda vam je poznato gda je to most prek Mure šteri spaja Međimorje i Hrvaško. Vsi znamo gda je Međimorje naše malo, falačec zemle med dvemi vodami, a prek Mure je Hrvaška. No, nebrem to razmeti kaj je ve trelo zapirati toga prelaza par meseci predi nek bodemo zaprli vse prelaze. Kak god so se onda smijali z toga Lesarovoga mosta, čovek ima svojega mosta, a velijo gda je vu životo nigdar nej nikaj napravil, ali tej je most hajdig reda na pravil na toj našoj meji z Deželom. Ak ste pozabili bodem vas zmislil, Janezi so navalili na nas i šteli so kaj bi jim priznali kak je meja na Muri. To je hajdig dugo trajalo, a gda smo naprajli mosta unda so se vgasli. Moj japica je rekel: – Meja je odnavek bila na Muri sam je unda Mura tekla čistam polek Lakoša, a to je par kilometri dale vu Deželo. A i Raskrižje je odnavek bilo Hrvaško, ali smo ga, na vse zadje, potepli. Vsa je sreč kaj je bar Štrigova naša kak so Janezi pošlokjeni.

Navek sam veruval gda ga vu politiki dosta mesta za vse jerbo ga političarov premalo, ali ve vidim gda je nej navek ruon tak. Nešterni se svadijo, polevlejo, pak i bijejo. Nej znati kakši je to den bil, pred dva tjedne, vu Doljnjemo Kraljevco gda so kupice v zrak skakale i gda so se hadezeovci zbili med sobom? Brzčas je to moral biti nekši teški den, južina ili pak sparina ili nekaj još hujšega. Oni šteri so tam bili prepovedajo gda so se Ivković i Cerovec polevali, gda so se narivavali, gda so kupice trli, gda je i malo krvi poteklo (ne zna se točno čije), ali gda je, na vse zadje, vse završilo na šanko z jeno par putovalnih. I kušleci so pali. Kuliko se meni zdi za vse so krivi te novinari šteri mam vse napišejo kaj čujejo i vidijo, kak gda jedva čakajo kaj posvadijo naše političare. Pak kaj so nej čuli za selektivno pisanje?

Zvir:
http://www.mnovine.biz/novo/index.php?option=com_content&view=article&id=14519:sulejman-nam-je-vanei-od-zrinskoga&catid=301:joek-radnik&Itemid=575
i(l) str. 56 sim:
http://issuu.com/mnovine/docs/mnovine888i?mode=embed&layout=grey
i(l) str. 56 sim:
http://www.mnovine.biz/images/pdf/888/mnovine888i.pdf

* * * * * * * * * * * * * * * * * * * * *

Nikola Šubič Zrinski Sigetski – 1. del, 5:01
Govor doktora Zvonimira Bartoliča v Zaboku 6. rujna 2008.
http://www.youtube.com/watch?v=R6YkP8-OyTs

Vice Vukov – Beli most, 03:31
klavirski beglajt: Emil Vukov
mužika: Muhamed Sow
versi: Ivan Goran Kovačič