KRŠČEJNE MOŠTA

ZASADBREG, LOGOŽAREC 97

POČETAK CEREMONIJALA:

-zvoni zvonce i dolazi biskup uz pjesmu:

Došel bu došel sveti Martin,
On ga bu krstil, ja bum ga pil…
Kumek moj dragi daj se na pij,
Dugo nas ne bu daj se ga vžij…

BIŠKUP: Preštimani i poštuvani pajdaši i pajdašice, prijateli i prijateljice, sosedi i sosede, dragi naši gosti, a posebno pak dragi saki ponaosob vi dragi naši Logožarčani, Logožarčanke i Logožarčančići, se vi lejpe logožarske snehe, od une najmenše do najvekše, od une štera najviše do une štera najniže drži i frji z nosom dok ide po našoj vulici gori ili doli, dragi naši cenjeni i dobrodojšli logožarski zeti, naročito ako ste dobro baždareni na alkohol, i si vi drugi cenjeni i preštimani, šteri ste se dostojali dojti sem na ovo naše II logožarsko-martinsko krštenje mošta, po starim regulama i križevačko-logožarskim štatutima, za štero bi šteli kaj tu prinas, v našoj najlepšoj, najvožišoj, najkrajšoj ali zato i najveselišoj vulici v cejli Zasadi, postalo tradicionalno, kak i čudaj drugih lejpih stvari. Odma na početku, kak se to i šika, najlepše vas pozdravlam vu ime našega letošjega domačina, našega dragoga kak lagvić okrogloga soseda Dragija, za šteroga se prepoveda da ima največ i najbojše vino vu vulici. To bomo valda denes meli priliku i prekontrolerati. I ako je to istina, je to sigurno zato kaj je z doljega kraja pak od nas sih se doteće k jemu v pevnicu. Isto bi vas tak se skupa šteo pozdrajti i v svoje ime, bolše ve odmah, jer kak bu potli to sam dragi Bog zna, jel bumo se poznali, ili bumo pod tablaj, ili pak nedaj Bok, pod brajdaj spali.

Dragi prijateli, zišli smo se kak se to i šika, zaradi jenoga vrlo važnoga teškoga i odgovornoga dela, kaj pokrstimo našega logožarskoga mošteka; i tuduma i ceplenoga a bormeš i fceplenoga, vu vino, kaj ga pripitomimo i podomačimo, kaj se žim sprijateljimo ka nau z nas delao hrmake. No predi kak bilo kaj počnemo i kak se bilo čega primemo, kak se to navek i se po sod šika, i bez obzira kaj nešći od vas mortik ima išijas, ili ga je v križima vrezalo, ili pak ga pod lopaticom nekaj stolno žegeće i kaj mu se teško stati, obrnuti i genuti, kaj je zadrvenil, i zatrdil, predlažem da se na početku naših svečanih krstitki si skup lejpo stanemo i da si po našoj staroj navadi zmolimo vinskoga očenašeka, jer sedečka molitva dopuštena je samo betežnima, i unima na poštedi, grešnima, pijanima, poscanima i poriganima, a mi smo to bormeš za ve još nej.

POMOLIMO SE:

Vinček naš, koji jesi, v lagvu, vu flaši, vrčku, v pletenki ili v kupici,
Zlevli se još dugo let i z gustušom v gute i požerake naše,
Presvetli pamet našu, kakša je takša je.
Nek dojde k nam fina duha tvoja,
I nek navek bode z nami dobra vola tvoja,
Kak doma, tak i v pevnici, pri kleti ili pak vu vikendici,
Na igrališču, vatrogasnoj zabavi ili pre zadrugi,
Pre vuzmenki, pre ogju kre šume,
I se po sud de se, i da se, najdemo pre kupici.
Ne pusti nas krej od punoga vrčka
I ne oslobodi nas nigdar od vinske žeje.
Oslobodi nas od sega unoga kaj bi nas moglo posvaditi med sobom,
Od sih, sumji tračov, hude vole i hudih jezikov
Šteri bi se mogli zavleči vu nas i rezdvojiti nas.
Oslobodi nas od sakoga zla
Koje bi našemu želocu, našim nogama,
Ili još huje, glavi, naškoditi moglo.
Dej nam dobro raspoloženje,
Navek i se po sod,
Naročito kaj se tak lejpo veseli si skup čim vejč pot najdemo.
Grej nas bar tak kak nas greje ljubav,
Ili pak suha bukovina v žerečoj peči.
Budi navek za pravicu, slogu, veselje i pošteje.
Nej sam naše nego i lucko.
U ime oca lovca, sina gutavca i čučavca,
duha kopitanca šteri po jarkaj nagaja pijanca.
Amen.
Zdravo mladi moštek,
Bodi jaki i močni
Pun dobrote i miline.
Bodi blagoslovljen med novim vinom.
Naj nam nigdar sfaliti,
I navek i se po sod skrbi za nas žejne,
Se do smrti naše
Amen.

BIRANJE KUMA:

Preštimani pajdaši i pajdašice, pošto smo se tak lejpo i verjem z srcem, za hasen pomolili, mogli bi prejti na samo krštenje ovoga našega mošteka.

Ali kak pri sakomu krštenju treba zbrati kuma, tak nam je i ve dužnost na početku zbrati kuma šteri bu pred sema vama ovomu našemu za ve još nevolnomu mošteku svedok. Kum mora biti trezna punoletna osoba, ozbilen gospon, i mora meti najbojše pilske, da ne rečem pijanske sposobnosti, a te su kak sigurno i sami znate: – glasno štucanje i podrigavanje, obavezno spaje v jarku kre ceste po mogučnosti pokrit z beciklinom, ili pak potprt na škraku pre vuzmenki i još k tomu kajkaše druge, Mostače more a i ne mora meti, a isto tak more biti i kosmat, makar je niti to nej uvjet.

Ga opće je koga takšega denes tu med nami?

Aha se mi vidi da jenoga takšega vidim, vi gospon tam, Vi zotim lejpim hojzlipintlinom….

Gospon mi zgledi ozbiljna osoba, i nadjam se da nišći nema nikaj protiv toga kaj smo rom jega zebrali našemu mošteku za kuma, a verjem da niti un nema nikaj proti takšoj kumovini. To kaj je naš gospon nej rom najbole pri sebi, je sigurno od uzbuđenja, pak mu to bumo oprostili, jer ak bumo čekali da se zbere, onda naš dragi moštek bormeš nau nigdar kršten, a naš domaćin sosed Drago, kak i vi si drugi bi od dugoga čekaja mogli pomreti od žeje. Prosim vas zato gospon kum, kaj fletno dojšli sem i kaj prevzemete maloga mošteka, te da mesto jega vi odgovorite na pitaja štera nebreju ostati brez odgovora.

Mežnar zvoni i slijedi pjesma:

Došel bu došel dragi Martin,
On ga bu krstil, ja bum ga pil…

PITANJA:

Moštek jel ti dolaziš pred naša poštuvana lica da se krstiš?

KUM: Dolazim.

Reči nam jel istina da si opsednut z raznimi nečistimi duhi, kak na primjer z osama, muhama, pavukima, mravlama, črvima, pužima i drugim skakajučim i pužečim gadima i smradima?

KUM: Jesam.

E viš, zato si kažjen i moraš se očistiti.Zmisli se da su te najpredi v goricaj ftrgli s trsa de si se deblal i sunčal kak debeli lejni maček i hitili v konte, koše, pute, pa su te dopelali v prešu i z gveštropm te zgjeli i stiskali. Potli su te deli pod prešpaj i dobro te zgjeli i žmeknuli tak kaj su ti kosti pokale i kaj je krvavi znoj z tebe curel. Onda su te posprajli v veliki kmični lagev, da bi se v tom zatvoru i kmici popravil. A ti si pak nutri bučal i mumlal kak stari medved.Ve te tu pred kumom i semi ostalima pitam, si dojšel k pameti, jel se kaješ za počinjene grehe, jel se očeš poprajti i jel se očeš denes tu pred nami svečano krstiti?

KUM: Oćem.

Drago mi je kaj tak veliš. Ali ti si poznati svadlivec i hmoje si čudi, tentaš ljudi kaj se po seli svadiju, po cestama jih koturaš, mečeš jih po grabaj, razbijaš jim glave, potičeš na neslogu i tiraš jih kaj okoli sebe delaju nered.

Pitam te jel se i toga sega odričeš?

KUM: Odričem se.

E ve te pak moštek još dale pitam jel buš i v buduće veselio društva, rezigravao srca kaj budu navek srečna i spokojnma, i jel buš krepil zmoćena tela i duše.

KUM: Bodem.

Daklem, posle ovih tvojih reči, moramo još jemput zahvaliti unomu koji nam te je dal. Moramo se zmisliti i moliti da tej isti blagoslovi se težake, kopače. vezače, rezače, špricače, berače, zlevače, pretakače i prodavače kaj te budu i dale nama žejnima točili i omogučili piti.

Molimo Svevišnjega da te nadehne z čistim duhom,da te sačuvle od sake kaplice vode i drugih činov koji bi te mogli preveć rezrediti i tak pokvariti. Nek Svevišnji usliši ovu našu molitvu za se vjeke vjekova, bar dok te ne spijemo i nek nam sema da zdravlja, veselja i svojega blagoslova.

KRŠTENJE:

Pošto smo se ovo do ve, tak lejpo zbavili, moremo prejti na samo krštenje našega mošteka.

Moštek, ja te krstim vu vino, vu ime Bakusa, oca vina, vu ime Martina, jegovoga sina i duha od šteroga moštek kuha.

Još bumo dodali i malo soli, da od tebe nigdar nikoga glava ne boli, i mir navek nek bude s tobom i da buš navek pun slasne duhe i jakosti.

Amen!

-Mežnar cinka z zvoncem i počinje čitanje litanija.

I na kraju kak se to šika moramo još zmoliti vinske litanije:

L I T A N I J E :

Dobra kaplica, OKREPI NAS
Konjak z limunom,
Vinski gulaš,
Dobra kupica,
Dobra črešjovka,
Čaj z limunom i rumom
Juha z rezancaj, DOJDI K NAM
Govedina s hrenom,
Šunkica z mladim lukom,
Tusta goska z mlincima,
Fini pohanci
Dobri odojček,
Fina pečenica,
Purica s kroketima
Pečena raca
Kisela repa z rebrecaj,
Grah pretepeni,
Kranjski klobasi,
Filana paprika,
Kuruzni žgonci,
Kiseli vugorki,
Sir z vrhjom,
Krpice z zeljom,
Knedlini s slivami,
Cvirki z lukom,
Sendvić s frtalom,
Čurke z zeljem,
Beli bubregi z lukom
Šmarglin z šalatom,
Tikvine pogače,
Fanjki s pekmesom,
Zdigani kolači,
Fini štrukli od sira,
Orehova gibanica,
Pisana makovjača,
Vroči pečeni kostaji,

Zmožna jakost vinska, OHRABRI NAS
Zmožna vinska duha, OHRABRI NAS
Pune kupice, OHRABRITE NAS
Ekspres kava,
Dragi trsek, POMOZI NAM
Lejpi grozdek,
Prave gorice,
Dobre šnapserice.

Od malog prihoda, OSLOBODI NAS
Od praznoga lagva,
Od dosadnih gostov,
Od hude babe i babjega jezika,
Od jalnih sosedov,
Od premalih kupici,
Od prevelikih cena,
Od premalih plaći,
Od prehudoga dela
Od babine papuće,
Od hmaje punice,
Od postele pod stolom, OSLOBODI NAS,
Od svaje z sosedaj,
Od mraza gadnoga,
Od toče nemilosrdne,
Od preslabog špricara,
Od sega hudoga
Od sakoga betega.

ZAVRŠETAK CEREMONIJE:

I još molitva na kraju za se lejpo i dobro kaj nam se denes dogodilo ili se još bo dogodilo.

Vinček naš, šteri jesi v kriglinu, vlej se v gute naše, rasvetli pamet našu, dojdi k nam plemenita duha tvoja, i dobra vola tvoja, kak vu kleti i v lagvu, tak i v glavaj našaj. Jakost svoju dej nam denes i zutra, i ne pušćaj nas od pune bučke. Piti dosta dej nam još dugo i ne otpusti nas od punoga kriglina kak i mi ne odpušćamo nikoga. Ne otpelaj nas v praznu pevnicu. Oslobodi nas od vinske žeje i sakoga zla kaj bi nam bilo dej i bilo kak naškoditi moglo.

Zdravo vino rumeno, jakosti puno i nek bu nam saka dobrota z tobom.Bodi blagoslovleno i sake fale vredno med novim vinom i blagoslovlen rod tvoj na trsu i v lagvu. Staro vino, kak mati novoga vina, skrbi za okrepu nas žejnih navek dok gut bu nas na svejtu i dok gut bo nam po požerakima moglo teči.

Vu ime oca lovca, sina gutavca i štucavca, i duha kopitanca šteri po grabi nagaja pijanca.

Živeli, i na zdravlje sema.

Ceremonijal završava pjesmom:

Još ni jeden Zagorec,…
Pijmo bračo vince voda naj stoji…
Zato bračo pijmo ga…
dragi pajdaši, moš je pokršten i prekršten vu vino.
Naj saki tuliko vinca pije
da ga se do volje vžije,
Pamet naj nuca da od preveć vina ne štuca,
nek ne loće, da želodec ne brboče.

Z dobrim tekom ječte i pijte, sega se navžijte, od mužike vuha napasite, a za tanec noge nabrusite, i na našega vrednoga letošjega ali i lanjskoga domaćina se zmislite.

Zasadbreg, 11. studeni 1997.

http://fly.cc.fer.hr/~kkolac/martinje.htm

* * * * * * * * * * * * * * * * * * * * * * * * * * * *

Zagrebacki Tamburasi – Dosel Bu Dosel Sveti Martin, 03:05