Lipa naša čakavska / ikavska
Novi list, 2012-12-06
Prilog četrkom Beseda
4 članki na čakavščine
http://novine.novilist.hr/Default.asp?WCI=Rubrike&WCU=285E28632859285A2863285A28582859285A2863288A288D2863286328632863286328592863T
iliti:
(1/4)
TAKO SE REČE
Kada se nikada ne bi niš menjalo, bi nan štufno bilo
Znan jenu staru nekadajnu našu poslovicu, ka govori da se mesec menja ne nebe – pa kako ne bi čovek na zemje. A danaska je Mikulova i želin van da i ako niste već deca, dobijete kakov regalić…
Piše Ivanka GLOGOVIĆ KLARIĆ
Ne moren se spametit kade san to pročitala, ma znan jenu staru nekadajnu našu poslovicu, ka govori da se mesec menja na nebe – pa kako ne bi čovek na zemje. A jedan ruski narod (Oseti) va svojoj poslovice špjeguje da perfin i more menja mesto. Ovi dani su mi se dogajale se neke pomalo čudne stvari, ke su me spametile da dosta dugo vreme se va škole, a ni va novinah ni spominjal Mikula al Sv. Nikola. Zadnjeh let se opet čuda piše o temu, pa mi muž govori neka s ten ne gubin vreme. A ja san se spametila oveh besed, ke san stavila i va naslov, pa san mu rekla da kad se j’ i to promenilo, ću i ja malo prekinut z onemi simpatišnemi komentari od njegove dece va škole, pa se ipak malo pozabavit z Mikulun i Mikulovun. Ma najprvo ću vas, ki ovo čitate, pitat da provate ugonit ča j’ to: »Nikada ga ni bilo, neće ga ni bit, a sada je!«
Dino, Olga i Mikula
Provala san na si mili modi doznat kako se po domaći reče zagonetka (aš ovo ča san vas pitala je zagonetka!), ma nisan doznala. Namesto tega san čula i pročitala čuda stvari, vezaneh za Svetega Mikulu. Sigurno već znate da j’ umrl 6. XII. 327. leta, da j’ bil biškup, da j’ pomogal i kako j’ pomogal onen siromašnen divojkan da se ožene, da j’ zaštitnik pomorci i dečine, koj sako leto nosi regali. A ja ću van sada povedet zaš san se tako trdoglavo ćapala baš za ta njegov dan.
Pred malo san prebirala po nekeh libreh keh niman već kade držat, pa bin ih morda mogla kemugod dat, i našla san libar va ken je bilo napisano: »Ivanki od Sv. Nikole«. Ni od kega, ni kada, ma samo san videla kada i kade je libar tiskan. Potle tega me j’ pasanega četrtka teta Vida (nekada opatijska, a sada lovranska), zvala da njoj pomoren okol moje pjesmi Mikulova, aš da ni sigurna ako se točno spamećuje seh besed, a libar ne more nać. Ja se nisan mogla zajno spametit ni da san ja to napisala, ma san ipak pjesmu brzo našla – pa smo lepo poćakulale. Va Besede san ta isti dan pročitala srdašno Dinotovo pismo Mikule, ma posebno me j’ zaintrigal on Olgin »Sveti Mikula« i on dimnjak kega j’ spomenula. To j’ bil treći senjal da se moran pozabavit z Mikulun. Tetu Vidu san već prvo rešila, on Olgin dimnjak nima veze z Mikulun, aš je Djed Mraz hital stvari kroz dimnjak (ne znan ši po noven to dela i Djed Božićnjak !?!), ma ono ča me j’ najviše čudilo, je on već spomenuti libar.
Krampusove šibi
Zvala san svoju najboju prijatelicu Alenčicu da mi pomore, i ona se j’ spametila (saka njoj čast!), da smo va prven razrede osnovne školi za Mikulovu bili va današnjen »Imperijale«. (Je to onda već bil hotel »Moskva«?) Bili su tamo Sv. Nikola i krampus. On prvi nan je delil regali, a ov drugi, vrag, je rošćal z verigami i pretil nan da ćemo dobit samo šibu ako smo bili zločesti. Arivala se j’ perfin spametit da j’ dobila naranču, ka j’ bila vela retkost za ono vreme, ma ja se ne spametin san i ja dobila naranču, al morda samo šibu!
Bilo j’ to1945. – va pasanen stoleće i milenije – a on moj libar je tiskan 1946., kada se ni više držalo do Mikulovi. Spominjen ga opet posebno zaradi naslova: »Priče o Lenjinu«. Potle tega ni više bilo Mikulovi ni Sv.Nikole, vezano za »javne manifestacije«, leh su nan samo doma va kalcetu al postol, ki su bili na poneštre, stavili kakov oreh al bunbon. Čula san od Vlasti da bi oni stavjali na poneštru pijat, ma dimnjak se ni nikada spominjal. Kad san pak na kalendare videla da j’ Mikulova baš drugi četrtak, morala san se ovo napisat!
Joj, oprostite, pozabila san na onu zagonetku na početke. Imeli ste dosta vremena za ugonit, a ako niste ipak arivali – to je današnji dan. Mane je to danas, dokle se ovo pišen, a van drugen on dan kada budete ovo čitali. Se nadan da će bit najviše onisteh ki će to pročitat baš na Mikulovu 2012. leta i želin sen njin, magar nisu već deca, da dobiju čagod od Svetega Mikuli.
Nastavek (preostali tri članki):
Turopolska forumgorica
POČAKAJ (PO-ČA-KAJ) – Lipa naša čakavska
http://www.forumgorica.com/kajkavski/pocakaj-(po-ca-kaj)-lipa-nasa-cakavska/msg47630/#msg47630
KLAPA ŠIBENIK – NIKOLINA, 02:57
