Pregled tisKAJna

Varaždinske vesti, br. 3546, 18.12. 2012.

Piše Barica Pahič

Našem se predsedniku Vlade saki čas nekaj zareče, a da mu nieje lehko, vidi se i potomu da je i Boga počel spominjati, a to se človeku dogodi gda se druge inštancije zataje.

Ja ga čist razmem. Ima  praf da misli  na  fnoge hrvatske podeljenosti. Pak si znamo da su Hrvati podeljeni na črljene, črne, zelene i žute, na lieve, desne i srednje, na večince i manjince, na fkradljifce i okrađene, na zaposlene šteri ne delaju i one šteri su nezaposleni, na one šteri su dobili vritnjak i ostali  bez zarađene plače  i, naravno otpremnine, jer su jim poduzeća propala, i na one šteri kak otpremninu dobiju po nekoliko milijunčičev (vmanjenica je namerna da se vidi kak su malo dobili).

Kie bi se to mogel zjediniti  i snajti se f takve zmešarije. A k tomu smo još  podeljeni i  na kajkafce, čakafce i štokafce, na školovane i neškolovane, na one šteri čitaju knjige i šteri ne čitaju ništ, a i na takšne osobenjake šteri knjige pišeju ili proučavljeju. A ima i toga pa  i paradoksalcov šteri takvim dokazima hrvatske podeljenosti skažuju zahvalnost za ono kaj su napravili za grad i za svoj paradoksalni narod. O glazbenoj podeljenosti pak, s obzirom na ovolietne “Barokne”, ne vupam se ni beknuti.

Na kraju vam, po dužnosti, predstavljam Marijana Horvata, pisca romana (prema “Karolini Suhodolskoj”  je skladana i opera), pripovesti i popefki. Na njegov tekst “Šlingom šlingan Jalžabet” je Štef Mikac skladal scensku sliku. Horvatova popefka, sonet na kajkafščine, vam je f prilogu:

Lepa Kata

Rastergana bluza, rascufana kikla,
razdrti cokoliši, lučeju van palci.
Na pleči ji grba odjenpot znikla,
kofrta na glavi kak gnezdo v trnaci.
Zbrazdano lice, povehnule čube,
roke drščeče, noge furt popleče.
Gori zdiže roke, skriva falše zube.
Ljudi stiha vele: “Neje mela sreče”.
Tak je došla doma lepa dekla Kata
za kojom ni tak zdavna zdihavalo selo.
Nišče ni bil dober, štelo joj se zlata,
odišla je v kraje gde se drugač melo.
Ofucali joj telo, oglodali kosti,
ostala bez duše.Sega joj je dosti.

http://varazdinske-vijesti.hr/kaj-je-nase-pitanje-i-nas-odgovor/horvatova-popefka-%E2%80%93-sonet.html
i(l) str. 21 sim:
http://varazdinske-vijesti.hr/pdf/3546.pdf

POPEVKE SEM SLAGAL RITZ BAR ZAGREB 1941, 01:25