Varaždinski tjednik, 3. sečna 2013. / Glas građanov

Kočenska i zbeljefska božična šega

Jo vezda imam, ka namo cepidločili, kolo pedeset let. Dok sam bila mala puckica moj tatek je navek na Badjak hvečer donesev f hižu skorom celu balu slame. Još se dendenes zmislim kak je držav to slamu v roki i bajav. Zoto sam bila sa srečna i presrečna dok sam vloni čistam slučejno čula jenoga Gorekočenca kak tečno i sočno, unak praf po starinski recitera to istu bajalicu. Srce mi je zaigralo i rekla sam soma sebi – ak ju je več nešče zapamtiv da to nabu zabadaf. Tak je i bilo. Prvo smo ju zapisali, pak smo ju snimili na cedea, pak smo se zmislili da bi to bilo dobro ljudima pokozati. Poprem zoto kaj još ima unih koji se toga zmisliju, a koji su morti i negda zdavna i somi bajali.

Nojpredi smo se z velečasnim Karlom Koračevićem f cerkvi Uskrsnuća Isusova f Kočen Marofu se doguvurili, a unda smo si na Badjak hvečer lepo oblekli kočensku narodnu nošju, prepravili smo slamu i koledo i išli smo k polnočki. Peške. Nojmlajši član Teo Novosel je nesev fenera. Bormeš nas se je zišlo jeno dvajsti, kaj storih, kaj mlodih. Po potu smo popevali božične pesme i morem vam reči da mi je srce bilo veselo.

Jedva sam čekala da dojdemu f cerkvu i da naš Danijel Stanek, koji je bajalicu zapmtiv, lepo ljudima otčestita Božič po stori starinski šegi. Znola sam da bu ljudima koji buju to poslušali tak kak i meni i da bu im došlo drogo i milo koli srca.
Tak je i bilo. Dok se je složiv stolek i koledo i mi si z udruge f narodnim nošjama stali koli stola, kak prova velika družina to je bilo nekaj za videti. Spod stolnaka se je po starinski dev križ naprovleni od slame, a na stol kruh i v zdelici kajkašnoga zrja, respelo i sveča. Se je to bilo za dobrobit f drugi leti, ka bu sega obilja Božek dov.

F cerkvi su se svetla zgasila i došev je japa, f našem slučaju to je biv i pamtilec kočenske i zbeljefske bajalice gospun Danijel Stanek. Tak je lepo sočno otprepovedav bajalicu ka su i meni i drugima nekšne mrovlje prešle po hrptišču. Japa su nas pozvali ka si si pokleknemo kak prova družina i zmolimo očenaš, zdravumariju i slavaocu, a unda je rekev dedeku nek ogja doma kuri, a si drugi z družine da ideju na polnočku. Nojlepši del bajanja mi je biv dok nam je čestitor zaželev sega, samo ne betega. Uni z evropske unije tak i tak nam ne daju baš preveč hroniti žugice, racice i druge drobne drobnine kak bajalica veli, a da ne spominjem ludrice z maslom kad krof više niti nema.

Se f semu bilo je lepo, vidla sam da su nas joko slikali, a mi se vidi i da su jeni babici i dedeku ka su bili tam malo dale f cerkvi soze došle na oči. Kak i ne bi. Su se zasigurno f misli vrnuli f negdašje vreme, a negdašja vremena naveke nekšni žol zazivljeju vu nami.

Posle polnočke smo si na cerkvenomu dvorišču spili kuhanoga vina koje su prepravili udrugori Đurek Kobolof i Štefek Novoselof, pak su si ljudi lepo čestitali, malo su se med sobom pospominali, a mi se vidi da je i župnik biv nekak vesel i zadovolen.

Pot pak od cerkve do doma f lepi božični noči je priča zo se. O tomu bi se dola zapisati još jena ovakva notica. Zoto mlodi, a i uni stori, zgasite malo, kak se uno veli, fesbuka i mejla, esemese i druge potrebne stvori (samo če su v rokaj spametnih ljudi, kak je nedogo rekev jen član udruge) i ite nekam peške, spominajte se i ite jen drugomu f hižu, a morete se i učlaniti f Udrugu „Hajdina”. Tam je nigdor ne dosadno, jer naveke zmišljamo kak bi ščuvali starinske kočenske i zbeljefske šege.

Precednica Udruge „ Hajdina ”
Ruža Levatič

Bajanje v Međimurju

Na tom mladom ljetu,
zdravi i veseli,
tusti i debeli,
kak jeni jeleni.
Rodilo vam polje žitom,
dvor živinom.
Dej vam bog:
puriče, ročiče, teliče, čmeliče,
konjiče, voliče, štale žrebci, pojate s telci.
Hiže skinčiti i to z dečki,
koji ne miljuju puške, sablje gori zdiči
i za domovinu i krščonsku veru krv prelejati.
Koj visoko sedi, široko gledi
i belu ljeljuju v roki derži.
Dej vam Bog mira Božjega
i zdušnoga zveličenja nojveč.
Amen.

Srečen Božič!

http://glazba.biskupija-varazdinska.hr/djeca-i-mladi/zvjezdari/

LIDIA BAYUK Murinsel-Celtica – Novo Se Leto Veseli, 02:54