Pregled tisKAJna

Varaždinske vesti, br. 3551, 22.01. 2013.

Piše Barica Pahič

Gde su oni išli f školu?
 
Puno ljudi misli da prinas nekaj ni kak treba. Zaprav, da nikaj ni kak treba. Po novinami i na TV-u još naviek traju svađe polek zdravstvenoga odgoja i ponašanja i rečnika javnika od šterih takev rečnik ni takve ponašanje niesme očekivali i fnogi se pitaju gde su oni išli f školu i gde jim se zagubila ona mala knjigica štera se zove Bonton.

One nejavne, mučeče i trpeče obične ljude, šteri se to moraju poslušati, trpeti našu javnu sramotu i živeti privatnu žalost, a bormeš i strah od se večih računov i nesigurne budučnosti, lovi nekšna bezvoljnost i osečanje nemoči. Niotkud nema nikakšnog ohrabrenja zate kaj denešnjim obečanjem političarov male kie veruje, a ni oni nam ne nudiju baš svietle perspektive.

Morti je nekojih ipak sram. Za primer takvega stanja more se zeti jen mali, za večinu denešnjih, za kruh sagdiešnji zabrinutih ljudi, male važno Varaždinsko književno društvo, predmet mojega zanimanja i o čijem delovanju nastojim nekaj pisati. Najme, prošle subote (12. sečna, januaruša ili malobožičnjaka, kak hočete) ovega nesrečnoga 2013. leta, bila je godišnja i izborna skupščina Društva. Od skorom pedeset ljudi šteri su se vglavnem trsili da v Društvo budu primljeni, komaj se skupil kvorum. Od predstavnikov medija ni bilo ni traga. Precednica, gđa Nada Rukav-Bogojević štera se ni za živu glavu na tu dužnost nie več dala kandidierati, podnesla je izvešče o temu kaj je z velikim naporem i z malo penez Društvo ipak napravilo, a i ciela je skupščina pretekla po semi pravilimi štera se vutem moraju poštivati. Ni drugi bivši predcedniki/ce se za tu funkciju niesu dali nagovoriti na kandidaturu jer je to nie same protokolarni položaj neg teška i naporna obveza.

(Dek je bilo penez i mogla se deliti potpora za izdavanje knjig, bilo je i zainteresieranih, a vezda su se pasivizierali uprav oni šteri su od Društva imeli največu korist.) Zebrano je novo vodstvo, a nazočnikov je bilo komaj tulike da se zbereju obvezatna organizacijska tiela i komisije Društva. Za novoga precednika zebrani je gdin Nenad Slukić. Kaj to ni viest!? On je v predstavljanju svega programa nastupil prilično ohrabrujuče pa je z tiem unesel i male optimizma. Ali ono kaj je v semu meni ostavilo najžuhkeši občutek, bilo je očitovanje bivšega vodstva o brisanju z članstva onie šteri niesu plačali članarinu. Jake malu. Jeden od njih je osamnaest liet nie za nju maral, a dobre zna da je nužna za financieranje aktivnosti VKD-a. Kaj reči na se to? Ništ! Zbilja se nema kaj još reči.

Zvir:
http://varazdinske-vijesti.hr/kaj-je-nase-pitanje-i-nas-odgovor/

Citat:

8. Več za Kaj dela on kaj Kajkavski kune, špota i švanji neg on kaj zpametno štoka o Baladam Miroslava Krleže.

Prof. Željko Funda: KAJOFILSKO-KAJOLOŠKA DEKLARACIJA O KAJKAVSKOMU JEZIKU

http://www.forumgorica.com/kajkavski/hrvacki-trojezicni-pluralizem-ili-sto-jenoumle/msg3144/#msg3144

Bonton u restoranu – Pervan , 06:51
http://www.youtube.com/watch?v=b32b-TptupY