Pregled tisKAJna

Varaždinske vesti, br. 3556, 26.02. 2013.

Piše Barica Pahič

KAJ je naše pitanje i naš odgovor 
 
Puno liepi popiefki
 
Pam(e)tim ga (Ivu Posavca) z kniževni večeri v Ivancu ili na okupljanju f povodu proslave Dana planeta Zemlje na manifestacije “Ivanjščica diše za cieli sviet” kak ne baš visuokoga, ali kričečega človiečeca šteri je baš liepe, glasne i onak zrezne čital svoje popiefke. A posebne mi je ostalo vu vuhu gda bi rekel sance, meste sunce i to mi je bilo zbilja zanimljive. .
 
 
Još praf niesem prelistala zadnji “Varaždinec”, a več mi je zazvonil telefon i postavljeno mi jeno čist opravdane pitanje:
– Zakaj nieste v zadnji tekst deli Ivu Posavca? Pak i on ima ljubavne popiefke. Si je človek to zaslužil. Tulike je popefki napisal i tulike nagrad dobil, največ njih v Ivancu na natječaju “Draga domača rieč”, a vi o njemu ništ. Več ste tulike pesnike zredali, a on vam je još nie došel na red. Kaj ga zbegavljete? Ni knjige još nema. Bil mi se pohvalil da bu mu Varaždinsko književno društvo na svuoj trošek tiskalo knjigu, ali oni šteri su mu to obečali su vglavnem pomrli ili pak nemaju nikakvega utjecaja i tak opet nič. Prie bu siromak vumrl neg da ga se kie javne zmisli.

Moram reći da nie bilo ni zbegavanja ni zapostavljanja, a pogotove je daleko od istine da kaj imam proti njemu. Zadnji put vu Varaždinskem književnem zborniku zbilja niesem našla nijenu njegvu ljubavnu pesmu,  pa još da je na kajkafščine. A gde da jih najdem? –Pri poiskanju- rekla bi moja mama. Zate sam za ovie broj pričela preiskavati one male knjigice štere nose naslov “Ivanečki pjesnički krug” i ”Draga domača rieč”.

I kaj sam našla? Puno liepi popiefki i na standardnom književnom jeziku i na ivaniečkem, bolše reči na kuoškovskem miesnem govoru jer je Ivo Posavec rođeni 1944. leta f Koškovcu kre Ivanca gde i denes skromne živi. Pamtim ga z kniževni večeri v Ivancu ili na okupljanju f povodu proslave Dana planeta Zemlje na manifestacije “Ivanjščica diše za cieli sviet” kak ne baš visuokoga, ali kričečega človiečeca šteri je baš liepe, glasne i onak zrezne čital svoje popiefke. A posebne mi je ostalo vu vuhu gda bi rekel sance, meste sunce i to mi je bilo zbilja zanimljive.

A preiskavajuč sem prelistala se zbornike štere sem doma našla. Fnuege njegve pesme (i opisne i domoljubne i socijalne, a bormeš i one gde o kojčemu premišljuje) su dost  pesimistične, ali f knigice “Draga domača rieč” od 1999. leta našla sam i jenu  veselejšu:

Poberi me

Donesel sem ti
Divje dišanje ruožic
V raskuosmani pesmi lasi
Donesel sem ti
Šumsku slatkuoču jagode
V žejnomu popu vusnic
Donesel sem ti
Večernu pesmu zviezde
Na otprtomu nebi oka
Splel sem ti
– o jesem jesem –
Črlenu zibačku vetra
Od rok precveli  v iskanje
Na pragu sem te našel
zrielu v žejni molitvi:
– Dečec muaj, dečec
Jesen je!
Poberi me – poberi!

Vište, tak! Stiem sem ja svoju dužnost spunila. Morti  buju zadovoljni njegvi prijatelji, nie same vinski neg i pesnički, a on se razveseli ak to prečita. A morti  doživi i svoju knigu.

Zvir:
http://varazdinske-vijesti.hr/kaj-je-nase-pitanje-i-nas-odgovor/puno-liepi-popiefki.html
i(l) str. 21 sim:
http://varazdinske-vijesti.hr/pdf/3556.pdf

* * * * * * * * * * * * * * * * * * * * * * * * * * * * * *

Poleg jene vel(i)ke gor(ic)e
Faringaši z Prigorca pod Ivanjščicum

Zagorci smo ljudi pravi
KUD Faringaši i KUD Lompuš – Zagoci smo ljudi pravi, 04:16
(igraju skup na promocije Dana Ivanca v Krapine)