Varaždinske vesti, br. 3557, 05.03. 2013.

Piše Barica Pahič

KAJ je naše pitanje i naš odgovor

Moderni pozoji v skupimi auti letiju i z eroplani peršu po nebu

Moderni pozoji niesu pretpotopni pol ftiči pol kače, nek želiezni, ali jednak peršeju po zraku, pleziju po briegi, vliečeju se po dolinami (cestami), bljujeju grđi i  škodljivejši jogenj neg oni jadniki z staromodni fantazij. Rušiju grade i sela i pomoriju jezere ljudi kaj se i prinas zgodile v zadnjem ratu.

Dek človek čaka autobus, med ljudmi kojkakve stvari i nehoteč čuje. Tak sem ja čula spomenek bračnoga para šteri je svoju babicu spračal na put. Spominali su se o deci i problemi štere imaju z nju. Pucica pe f školu f jesen, a več zna čitati i prečitala je se slikovnice i bajke štere su imeli, a dečec, šteri ide f školu, neče čitati.

-Trebal bi prečitati “Šegrta Hlapića”, ali neče da ga j… – rekel je tata. – A i kaj bi  i čital bajke? Bolje je da rad ima kompjuter.
– Zapre se f sobu, vužge si kompač i onda čuješ same: Buuum! Tras! Fijuuu… – zasmejala se mama.

Autobus mi je došel i  morala sem iti. Duge sem premišljala kaj sem to čula, ali največ o bajkami i neverovatni dogajanji v njimi. Javljaju se tu liepe kraljevne ili siromašne puce štere junaki trebaju spasiti, pa coprnice, pozoji šteri bljujeju jogenj, konji z perutmi, junački i zločesti ljudi. Furt je rieč o boju  dobruete i zločestoče a dobre mora pobiediti. No je, javljaju se i nueve bajkovite knjige. Minulo je vrieme (još nie do kraja) kraljev, pozojev, copernic i leteči konjev, ali su  bajkoviti elementi ostali i v knigami i v našem življenju, ali obliečeni f modernejše obleke.

Pozoji niesu pretpotopni pol ftiči pol kače, nek želiezni, ali jednak peršeju po zraku, pleziju po briegi, vliečeju se po dolinami (cestami), bljujeju grđi i  škodljivejši jogenj neg oni jadniki z staromodni fantazij. Rušiju grade i sela i pomoriju jezere ljudi kaj se i prinas zgodile v zadnjem ratu. I to je bila borba dobrega i zla. Premogli su dobri kak i  mora biti, ali je onda bajka pričela teči najopak. Kaštigovani su najprie pobedniki, a pravi krivci su se najprie pritajili, a pokle nastavili pripovedati svoje najopačne bajke. A gda je zišle vun da je greh na njimi, pričeli su se zvlačiti da su napadnuti trebali biti pametnejši i bolj strpljivi, da pobednik nie pravi ak se ne pozabi i ne oprosti. I pričeli se pozivati na prava štera su nie priznavali napadnutem.

I tak se bajka nastavlja z dobrimi junaki (šteri su nezaposleni) i onemi z debelimi bankovnimi računi kaj v skupimi auti letiju i z eroplani peršu po nebu beržeše neg pozoji i vuče nas da i dalje trebamo biti pametni i strpljivi pa bu se dobro. A mi denes trebamo dobro, a nie nove bajke. Nek oni močni najprie obrneju sebe na dobrobit ljudi pa se najopačna bajka nebu produžavala. A kak to napraviti, morti bi se moglo nafčiti ak se dost rano počne čitati knjige o poštenju, pravednosti, marnosti i ljubavi med ljudmi pa i živeti po nafčenom.

Zvir:
http://varazdinske-vijesti.hr/kaj-je-nase-pitanje-i-nas-odgovor/moderni-pozoji-v-skupimi-auti-letiju-i-z-eroplani-persu-po-nebu.html
i(l) str. 25 sim:
http://varazdinske-vijesti.hr/pdf/3557.pdf

* * * * * * * * * * * * * * * * * * * * * * * * * * * * * *

Jurjovo na Odre 2009. – Sv. Jura vubija pozoja

Jurjevo u Odri 2009 Sv Juraj ubija zmaja, 04:03

Po legende, Sveti Juraj bil je rimski vojnik teri je vubil pozoja z kojna. Sako leto ludi su morali pozoju jednu deklu dati. Kat je sveti Juraj vubil pozoja onda je otkupil se dekle a nakom toga sve tambure su zaigrale i dekle zapevale.
Legenda o svetom Jurju pokazana je na Odre ispret cirkve na samo Jurjevo 23. travna 2009. leta.