Pregled tisKAJna

26.03.2013.

Barica Pahič

F zrcale na štero mislim nie bile nikakšne pobožnosti. Delalo se zaprav o zrcalu f štero bi se trebalo pogledati i onda pljunuti f ono kaj se tam vidi. No je, šalni človek šteri je to zrekel i s tiem zabavil i nasmejal puno ljudi, pokle je zrcale male zglancal. Zgledele je da je ono pozabljeno, da ga nišče več ne spominjal. Taman gda je zrcale  pričele kazati liepšu sliku, javil se još šalneši človek i pričel govoriti kak on pervoga  vidi v zrcale. I tie je tulike bil po medijima špotani, da je i novoizabrani papa, šteroga su si tak od srca dočakali, skorem opal v  drugi plan.

Imajuč na pameti se kaj se pretekloga tedna dogodile pri verhu vlasti, okoli vlasti i pri dnu življenja, ophajale su me kojkakve podobne i nepodobne misli. Navuki od tega kaj je uljuđene ili kulturne ophođenje med ljudmi su se rojili kak čmelci na vuletje. Zgledelo je da je se vezano za aktivnost bavljenja z jenu napuhanu okruglu kuožu, šteru po trave natiravlje šesnajst diečkov na igrališču i pod reflektori. Ali nie f tem germu ležal zajec. Imelo je to širše razmere. Si od medija su se nadmetali kie bu jakše i gorše vudril po nevažnemi šteri imaju vupača nekaj prigovoriti oniem važnim. Na dnevne svelte pokazale se cvetje okoli kojega su čmele brnale. Na red je došle i nekšno zrcalo. Nie “Zrcalo marijansko” štero je v 16. stolietju pisal varaždinski predigar Jura Habdeličev i s tiem potvrdil i ftvrdil kajkavski kak književni jezik. F zrcale na štero mislim nie bile nikakšne pobožnosti. Delalo se zaprav o zrcalu f štero bi se trebalo pogledati i onda pljunuti f ono kaj se tam vidi. No je, šalni človek šteri je to zrekel i s tiem zabavil i nasmejal puno ljudi, pokle je zrcale male zglancal. Zgledele je da je ono pozabljeno, da ga nišče več ne spominjal. Taman gda je zrcale  pričele kazati liepšu sliku, javil se još šalneši človek i pričel govoriti kak on pervoga  vidi v zrcale. I tie je tulike bil po medijima špotani, da je i novoizabrani papa, šteroga su si tak od srca dočakali, skorem opal v  drugi plan. Ali je nie, maker se male posmeknul jer se, kak obični človek, još nie privadil na povišeni položaj. No, je. Bilo je još kojkakvi govorov i zgovorv od vlasti, od onie pri vlasti i onie daleke od vlasti. Optužbe i protioptužbe, izjave i protiizjave! Onda su jeni rekli da su zvađeni z konteksta, a drugi da su nie mislili to kaj su rekli. Verujem jim. Puno put govore kaj ne misle. Vu semu tomu se zrcalila same opča uljuđenost; i ona institucionierana i kakti nedodirljiva, i ona štera bi trebala biti kuš. A večinom i je kuš ali se zgodi da nekomu pobegne rieč kak prdec f cirkvi. Zletel je i nemre nazaj. Z briega je leže hitati kamenje nadol, neg z dola na brieg. Nieki bu ipak nahrdal, a kie jasne je kaj amen. No, bez brige! Se bu to na kraju zglancane pa i zrcala f šterimi se i nehoteč ogledavljemo i gda nas muči strah kaj bi se v zrcali mogle videti. Zate je nie prerane triebe glancati zrcale i nie se vu njega pogledeti prie nek se opere lice (tj. savjest) ak još  znamo kaj to zapraf je. Mogla bi nam z zrcala naša vlastita slika splaziti jezik.

* * * * * * * * * * * * * * * * * * * * * * * * * * * * * *

KUD Kupljenovo – Kupljenski kipec, 04:58