Pregled tisKAJna

Varaždinske vesti, br. 3563, 16.04. 2013.

Piše Barica Pahič

KAJ je naše pitanje i naš odgovor

Morti je leže speti se na Ivojnščicu neg napisati popiefku

Ne bi štela još jemput prekesno pisati o onemu kaj je aktualne, Dana planeta Zemlje. Sakega leta ga z ekološkim recitalom na Ivojnščice obilježuje Varaždinsko književno društvo.

Na te proslave moreju nastupiti si pesniki šteri to jesu i si šteri se kak pesniki osečaju. S tiem želimo njegovati pesnički podmladek.V organizacije sudelujeju i pesniki z tzv. Ivanečkoga pesničkega kruga vu šterom je značajne deloval i pokojni Franc Hergov. Tu je Ivo Posavec, Ivek Kušteljegov, Vincek Slivarov, Zlatko Kovačevićev, a za ovega zadnjega mi je žal kaj nije objavljen tekst o njemu gda je pred dva lieta na “Dragi domači rieči”dobil nagradu za opus. Kak pesniki vu tie krug idu i novinari; Ljiljana Risek i Mladen Genc.

Kie god je duobil poticaj ili inšpiraciju da napiše popiefku, zna da je to nie laki posel. Morti je leže speti se na Ivojnščicu. Teške je na nju iti peške, ali je tuo nie teške zaprisegnutem planinarem. Drugi se daju tiem do planinarsekega duoma dopeljati. Pesnikem je do čiste prirode, do Ivojnščice štera od naviek diše za cieli sviet, kak je tuo rekel Ivica Jembrih. Gori se pojaviju i pesniki z drugi krajev. Ak je liepe vrieme, na verhu Ivojnščice je puno planinarov i zate je naviek zanimljive. Ak pa je gli i dejž, kie stigne natisne se f planinarski duom. A tam se tak glasne spomina i popievlje da človek svoju rieč ne čuje, ali mu je tople i nikam mu se ne žuri.

Meni pak je tuo povod da čitatelje upoznam baš z Vinkom (Vincom ili Vincekom kak ga več doma zoveju) Slivarom šteri sudeluje na recitalu, javlja se na natječaje “Drage domače” i ima vglavnem ljubavne i domoljubne popefke. Od 1992. leta vundal je šest knjižic popefki. Ak ste zaljubljenik f poeziju ili pak vas zanima same tuo kaj je napisal još jen Ivojnščun z Ivanečkoga pesničkoga kruga, morete dvie od njegvi popiefki prečteti ovde. Nebu vam žal.

Nigdar nikemu

Nigdar zbilja niesam
nikega tak gljibeke
nasil v skritem popeku
serca

Nigdar, veruj mi, niesam
nikemu daruval kašaricu
crvene ad stihev
i recvietene čežnje

Nigdar nikemu niesam
pošiljal krasuatu jutiernjega
papievunja
goalubičica biela
v iskunji

Nigdar nikemu
tuljike ljubavi papiefke
i zazavunja
a odzavunjala je some
merzla jaka tišina

* * * * * * * * * * * * * * * * *

Ne kaštigujte mi rieč

Če su ner je
rieči paštene
me su sigurne je

Žaluesne mi v persi
serce narikuje
jer zatrajhati bi je šteli
a tak sam je rad imel
kak pervu ruožu
vuletiešnju

Ne kaštigujte mi
dragu materinu rieč
bo došle vrieme
a rieči neboš znal
i za koa te onda
dragi Buog dal

Zvir:
str. 21 sim
http://varazdinske-vijesti.hr/pdf/3563.pdf 
Aktuelni broj VV:
http://varazdinske-vijesti.hr/online/Main.php?MagID=1&MagNo=1

VESELI VOĆANCI – navrh gore ivančice, 03:05
http://www.youtube.com/watch?v=jdn_WVT3F64