Pregled tisKAJna

Međimurske novine,
e-vundano 22.04.2013.

Premišlavanje Jožeka radnika

V se bode prinas v Međimorjo došlo na svoje, očem reči, vse se bode legalizeralo. Škedji, štale, drvarnice, komore, koci, šekreti, repnice, pelnice, kleti, vikendice, letne kuhje, zadje hiže… i vse drugo kaj je napravleno v fušo. Gradi, opčine i država bodo nekaj pokaserali, vsakomo falaček kolača kuliko so mo saborniki odrezali, samo deca štera so napravlena isto tak vu fušo, v šumi, goricaj, kuruzi, grmljo, v parmičo, na parmi…, oni bodo ostali brez paperov. Jedino oni i jive mame, japeki se od prvoga dneva skrivačkajo, ne bodo nikaj herbali od legalizacije. Ve vidite kak je to zišlo.
A vsi se falijo kak nam je čovek na prvi mesti. A kuliko vidimo na deco i žene smo čistam pozabili. No, nej mi, nek oni šteri zakone pišejo i oni šteri za jiv roke zdiguvlejo. Nešči što je jempot, dvapot ili tripot nekaj zazidal polek zakona, brez paperov, ve je vse dovlekel na svetlo dneva, a Marica štera je jempot, i to v kmici i na brzino, zdigla i reširila noge, mora čkometi i magaditi vse do kraja živleja. I svojega greha, kak ona zove Štefeka, mora furt z sobom nositi ili pak ga pelati za roko. De je tu pravica – to te ja pitam?

Na čakoskaj trataj, prek negdašje kasarne i prek štreke, bode se zidala fabrika za prati veša, očem reči, radne oprave. Vse je to vredo, brzčas je nejglavneše kaj se bode nekaj genulo, ali nebrem veruvati zakaj nam vsi govorijo kak je to ne zmazani posel i zmazana fabrika. Pak najte mi reči da bode to fabrika štera bode prala čiste jope?

Naš urednik, i to on glavni, Dejan Zrna, je lejpo priznal da je nam novinaraj nišči ne rekel da so v nedelo, v Lepoj našoj, bili nekši izbori. No, ak smo mi ne znali kak bodo znali oni ljudi šterima smo mi trebali reči ili pak napisati. Nešči je tu, brzčas, zahuzal i to nej malo nek fest. Vidlo se je to v nedelo da je došlo sam nekaj vejč od šesnaest procentov nas Međimorcov glase davat. Čim smo mi Međimorci ne vsi došli mam so esdepeovci, očem reči, kukurikači zgubili izbore. Nek se zna kuliko mi Međimorci vredimo, a ne kaj nas Zoki  furt zameče.

Nedelski Jožek Posavcov se je prijavil da bi štel biti naš međimorski župan. I to još jempot. Nekak vu isto vreme se je i Sandra Herman, belička puca štera je, kak gastarbajterica, ravnatelica prslavske pučke škole, kandiderala za zamjenico župana. No, kaj me ne bi vi krivo razmeli, moram vam reči da Jožek i Sandra nejdo skupa na izbore, sam so, minuli tjeden, rekli nam, svojemo biračkomo telo, kaj bi oni šteli biti. Najme kaj, Jožek ima svoje zamjenike, gospođo Renato i gospona Damira, a ravnatelica Sandra bode leva roka župano Mateko Posavco. A od predi se več zna da mo desna roka bode glavni međimorski „seljak, očem reči, haesesovec Zoran Zoki Vidović, šteri je, već štiri leti, desna roka čakoskomo gradonačelniko.

Vsi so več svoje župane dali vum sam se još čakajo hadezeovci i jiv međimorski šef Darko Horvat. Nekak si dugo gruntajo. Brzčas ga tak čuda onih šteri bi šteli biti župani, pak nebrejo zebrati pravoga i nejvrednešega. Morajo se požuriti jerbo pesek na predizbornoj vuri vse fletneše i fletneše curi, očem reči, izbori so vse bliže i bliže. Tre furt na vuru gledati kaj ne bi zakesnili, jerbo je prekesno iti v pondelek k nedeljni meši.

Naši međimorski meštri i obrtniki jako teško magadijo ovo krizo štera preveč dugo traje i vse teži i teži vežejo kraj z krajom. Vsi oni šteri so več ne mogli zdržati so podurali, očem reči, zaprli so svoje obrte i zobe deli na klin. Jako sam najgerek od čega itak ve ževijo? Znate kak je to da morate ostajti posla od šteroga ste na leta živeli, a drugo nikaj ne znate delati. Niti krasti ste se nej navčili, a samo od zraka je nej muoči živeti. Do penzije, po novomo, vam fali 5 -6 let, stric je lani hmrl, pak ti ve bodi spameten. Vsi znamo da naši obrtniki ne iščejo preveč, ne iščejo kruha brez motike i zato jim tre pomoči, pak makar pejo i v beli Zagreb grad, na Markov Trg. Vse za bolše i sigurneše zutra.

Nej znati je li ste čitali v novinaj ili pak poslušali na radio kak pajdaš Tonča prodavle svoje gorice i klet. Ovak je preglasil: prodavlem svoje gorice i klet na hataro Železne gore čistam blizo Svetoga Urbana. Ak se ne bodete žurili i dojdete v nedelo odvečer več bode v Urbano. Gorice obrezane, lagvi skorom puni, paperi čisti, fal dam sam kaj mi ne pobegne v Deželo.

Ne bodete veruvali, ali cesta od Svetoga Križa do Priloka je još nej gotova. A zdavnja so se hapili meštri delati, a delajo jo kak Noen svojo barko. Jesen je minula, zima je došla i minula, prtuletje je več tu, a i cestari so još navek tu. Kuliko sam mel za čuti, to se dela pomalem i jako dobro i precizno. Brzčas bi tua cesta, dok se jempot otpre, trebala dopelati priločanca Drageca Glavina znova vu gradonačelničko fotelja. Tak je bar po projektlino narisano, a i tak se priločanci spominajo. A vsi znamo: ak laže selo ne jažejo ljudi. No, pak je Prilok pravzaprav grad!

Serjančari so završili svojo šetnico polek Mure, no nejso gracki oci rekli je li ona bode sam za španceranje ili pak se bode i pijašilo po klupicaj? A i mladi se brzčas bodejo stiskali i parili po temaj klupicaj, jerbo je mladima vse dopuščeno. Bole na klupicaj nek na zemli. Zemla ili pak trava polek Mure je nejvečpot mokra i mrzla. Ipak je zdravlje za mladoga dečka i još mlajšo deklo važneše od vsega. Tre na bubrege, križe ( i kaj nebom spominjal one organe niže) paziti dok je čovek mladi, posle je nejvečpot prekesno. Klupice so na drugoj strani šetnice tak da nej muoči pasti v Muro kak god bi mladi žereči bili. Kuliko vidimo gracki oci so na vse mislili.

Zvir:
http://www.mnovine.hr/novo/index.php?option=com_content&view=article&id=19605:vse-se-bode-legalizeralo-sam-marica-nebre-tefeka-&catid=301:joek-radnik&Itemid=575
i(l) str. 64 sim:
http://issuu.com/mnovine/docs/mnovine918i?mode=embed&layout=grey       
i(l) str.64 sim:
http://www.mnovine.biz/images/pdf/918/mnovine918i.pdf       

* * * * * * * * * * * * * * * * * * * * * * * * * * * *

Ronald Braus,Iva Ranogajec & Ilirci – Oj, Štefek, Štefek (Krapina 2012) Nove popevke HQ, 03:18
(Viktor Crnek – Nevenka Puh – Darko Berović:)
Krapina 2012 (47.Festival kajkavske popevke) 08.09.2012.
http://www.youtube.com/user/kajkavskepopevke