Pregled tisKAJna

Varaždinske vesti, br. 3567, 14.05. 2013.

Piše Barica Pahič

– Ma naj mi reči da si i ti protiv EU-a? Preveč si pesimistična. Pokle kiše dojde i sunce – rečem da bi spomenek obrnula na veselejšu stran i zapopevam ji:“Hajdmo vu Varaždin gdi cvete ružmarin…”
– Se ti je pitanje sreče. Nekoji su pri nas imeli sreče hapiti europske položaje i plače, a drugi pak hrvatske siromaštve.
I onda mi scitiera Krležu: “Nešče obrne drek pod cekin, a nešče cekin pod drek.” (Na rubu pameti: Valent Žganec).
 

Prie teden dni mi se javila jena prijateljica i rekla mi da si želi dojti vu Varaždin, v šterom ni bila več od prie rata. Čak ni na Špancirfestu. Pitala me gda je najpogodnejše vrieme za dojti. Savetovala sam ju da sikak dojde da je liepe vrieme i tople jer je Varaždin najliepši gda zabljesne v suncu.

– Je, a kak to pogoditi gda se se pošemerile; i vrieme i ljudi? Zgledi kak da je Bog čiste zgubil kontrolu nad svietem.

I onda mi je spripovedala staru priču o tem kak je na svietu živel jen dober i pošten človek šteri je, mam gda je vumrl, čisti od greha, dospel na nebe. Sveti Peter mu je rekel da mu je v raju se dozvueljene, ali ak se namieri na jeno veliko zrcalo, čez štero Buog kontroliera življenje na zemlji, ne preporuča mu v njega pogledati. Mogel bi videti pekel, i biti kaštigani z oniem kaj bi vu njem videl. Tie se pravednik sprešetaval po raju i nameril na zrcale, ali se štel deržati upozorenja. No, kaj je več put kre njega prešel, to ga je več grizla radeznalest.

– Meni je tu liepe, ali zakaj ne bi videl kak je oniem f pieklu?

Na kraju je popustil. Pogledel.je v zrcale i videl kak sused ide k njegve žene spat. To ga je tak raščemerilo da je potrl zrcale. Odonda Buog nema kontrolu nad zemaljskim življenjem i zete se vu njem se pošemerile.

– Pa kaj je Bogu stvoriti nove zercale! – velim ja naivne.
– Nieje to problem, neg je nebeske vrieme drukčeše od zemaljskega. A štel je i ljude kaštigati poradi ftikanja v njegve posle. Morti je sreča v neznanju.

Skup smo se nasmejale te šale, a ona je nastavila:

– Kaj ti ne glediš televiziju? Kaj nie i prinas takva zmešarija i norija da tu ni Buog nemre napraviti reda. Več se ne zna kie je s kiem, a kie protiv koga. Same jeni druge opšpotavaju i vređaju. I si nas uveravaju da su baš oni naši spasitelji, a od sega nič. Ak nam Buog nemre pomoči, nebu nam ni EU, f šteru bumo vlezli kak muhe bez glave. Kaj nie tak?

– Ma naj mi reči da si i ti protiv EU-a? Preveč si pesimistična. Pokle kiše dojde i sunce – rečem da bi spomenek obrnula na veselejšu stran i zapopevam ji:“Hajdmo vu Varaždin gdi cvete ružmarin…”

– Se ti je pitanje sreče. Nekoji su pri nas imeli sreče hapiti europske položaje i plače, a drugi pak hrvatske siromaštve.
I onda mi scitiera Krležu: “Nešče obrne drek pod cekin, a nešče cekin pod drek.” (Na rubu pameti:Valent Žganec).

– Čuj, pa i tebi se se pošemerilo. Diela si na kup i Boga i nebo i Varaždin i Krležu. Kaj si ti prava?
– Same sem dokaz prave zmešarije. Vidimo se vu Varaždinu!

Na rubu pameti

Vuz Valent-inovo

Lamentacije Valenta Žganca zvanog Vudriga
(sfalela žganica il?)

Se kaj muž, pravzaprav, ima – je klet i v kleti bučkuriša hekto, a če taj ocet popije, onda mu tak veliju da je pijani prasec i fakin! A kak muž pravzaprav živi, ak se prav zeme? Na sejem prasca tira, a fileke si privuščiti, bogi-bogme, nemre, ali kravi svojoj papke z oljem maže i vole frizjera i kobile kristera i pod rep im s temjanom kadi, a sam pak, pravzaprav, kak marha nad marhami krepavle, i ak to mar-hašag ni, kaj onda je život kmetski? Baš prav veli Kinez: če misliš da hekto bučkuriša nekaj vredi, varaš se, dragec! Če misliš da z mlade cure nebu “striženo-košeno” postalo, znova si v zabludi. A ja im velim, gospon doktor: se to denes kaj se z luctvom događa je veliki oselski sprevod – ni repa, ni glave!

Nastavek:
http://www.forumgorica.com/kajkavski/pro(iliti)za-kajkavsku-p(r)oeziju/msg49859/#msg49859

Zvir:
http://varazdinske-vijesti.hr/kaj-je-nase-pitanje-i-nas-odgovor/nekoji-su-imeli-srece-hapiti-europske-place.html
i(l)
str. 29 sim
http://varazdinske-vijesti.hr/pdf/3567.pdf   
Aktuelni broj VV:
http://varazdinske-vijesti.hr/online/Main.php?MagID=1&MagNo=1 

* * * * * * * * * * * * * * * * * * * * * * * * * * * * * * * * * * *

Studentski Vokalni Studio Rijeka – Vuprem oči (Vinko Žganec), 01:51

Koncert v cirkve Sv. Jelene Križarice, Kastav, 18.06.2011.