Pregled tisKAJna

Varaždinske vesti, br. 3570, 04.06. 2013.

Piše Barica Pahič

A kakvi se oblizekov pak nema na TV-u?! Nudiju se recepti od šterih nam se same štečki meču. Nek bar na TV-u vidime kak se dobre živi. A piva? Teče kak po potoku. Kaj potoku? Kak zapenjeni vodopadi! Važne je da v reklami “teče med i mleko”. Buoljemu se naviek nadame kak god se ono f huodu popikavale.

Gda su Varaždinci dobili pervi prometni kružni tok, mam su zmislili vic o pijancu šteri je vu njem tak duge kružil dek se nie streznil. Kie je te mogel i pomisliti da bu prometni kružak došel v javni (politički) govor o čem smo se mogli uveriti prie par dnevi. Jeden jake poznati človek, ak ni po čem drugem, onda po velike plače (skorem sto tisučakov na mesec), rekel je da se hrvatske gospodarstve več deset liet verti f kružaku i nikak da zide vun. Pameten človek (kaj mu i same ime veli) je v te vertnje tulike zaslužil da se pri računanju tie penez i meni v glave zavertelo. A morti se zavertelo i našim vladajučim, maker je Glavni rekel da oni imaju svuoj smier i da po njem idu dalje. Ali kaj ak su fulali cestu?

Pred izbore su nam si govorili kaj su dobrega napravili ili pak buju napravili za naše glase. Zgledelo je da prinas je ili bu se v redu i da polek tolike uspehov nemame kaj mrgodati protiv vezdašnjeg stanja. Gde su oni šteri su pred par liet hodili s trasparenti “Bando lopovska!” Zgledi da isti i denes hodiju z njimi same su promenili ukrasni pridev. Perva je rieč ostala. Najavljuju blokade prometnic i štrajke pa jim se najavljuje rat. Kaj još ima takvi šterima rata nie dost? Sreča je kaj sme več na se naviknuti. No, nemre se reči ni da rata nema. Bar onega z rečmi i to na socijalnem puolju oko K i K (kontejnerov i kant, za smeče) i svetonazorskem oko ZO (zdravstvenoga odgoja). Na političkem se male kakti zmirile. Ali zdigli su se oni drukčeše “spolne orijentacije”. Ne znaš gdi se najjakše zašpičilo.

A kak je nam, najbolj se vidi v štere robne hiže. Povečaju cienu, pak ju sniziju za 10 ili 20%,  naj si mislime da sme prešli faleše. Ili da na krumpieru piše da je po 9, 99 kun, a nie kak na placu po 10. Kaj ti je jeftinuoča! No, ak “Kavaliri” zaigraju popefku: “V Varaždinu na placu ja pajdašicu mam…”, živlenje se leže podnese.
A kakvi se oblizekov pak nema na TV-u?! Nudiju se recepti od šterih nam se same štečki meču. Nek bar na TV-u vidime kak se dobre živi. A piva? Teče kak po potoku. Kaj potoku? Kak zapenjeni vodopadi! Važne je da v reklami “teče med i mleko”. Buoljemu se naviek nadame kak god se ono f huodu popikavale.

Na kraju i jena šala na tu temu:

Žena ide na plac i mužu nabroji se kaj mora kupiti i doma donesti.
– Buš mi još kupila pivu i novine.
– Pak nemrem ja se to! Veli se da žena derži tri vugla hiže, a ti mi i četertega na pleča rievlješ.
– No, pak ti jih ja pridržim dek se ti vrneš s placa.

Morti i to prejde v politički govor.

Zvir:
http://varazdinske-vijesti.hr/kaj-je-nase-pitanje-i-nas-odgovor/gde-su-oni-steri-su-hodili-s-transparenti.html
i(l)
str. 25. sim
http://varazdinske-vijesti.hr/pdf/3570.pdf
Aktuelni broj VV:
http://varazdinske-vijesti.hr/online/Main.php?MagID=1&MagNo=1

* * * * * * * * * * * * * * * * * * * * * * * * *

Mirjana Pospiš, Adam Končić i Kavaliri – “V Varaždinu na placu“, 03:12
“Lepum (s)našum” – L(j)ubeščica, 26. 01. 2011.