Sreda, 19. lipna 2013.
Des počimlu Dani grada Ivanca 2013.
Mnogi sadržaji za se generacije
Ivanec bu od des, 19. lipna do torka 24. lipna, živel v znaku mnoge sadržajov za se generacije terem bu obiležen Dan grada, ali i vulazek Hrvatske v Europsku uniju. Svečarski ivajnski dani teri se obiležavaju vuz blagdan rođejna sv. Iveka (Ivana) Krstitela, zaštitnika ivajnske župe i grada, počimlu v sredu 19. lipna izložbum fotografij Foto Oto kluba „Ivajnski motivi“ v gradske knižnice i čitaonice te svečanum sednicum gradskoga veča v Sredne škole Ivanec.
(V) četrtek bu v Dečjomu vrteku „Ivančice“ zdignena Zelena zastava terum bu se obiležilo pridruživajne toga vrteka mednarodne „družine“ eko- vrtekov, a v gradske večnice bu predstavlena „Ivajnska bibliografija“ prof. Marijana Kraša.
Centralni dogodek v petek 21. lipna bu opirajne Ivajnskoga gospodarskog semla ob 10.30 vur na izlagačkomu prostoru spred gradske večnice, v sklopu teroga bu održan i gospodarski forum, na teromu buju sudeluvali predstavniki ministarstvi vajnske poslov, regionalnoga razvoja i fondov EU-a, dela i penzijskoga sustava te državne agencij.
Posebno atraktivni sadržaji za decu i mlade održavali buju se toga dana popoldan, gda počimle Mali dečji festival v organizacije Društva „Naša deca“. Na-jnemu buju nastupila deca z tancne delaonice, klinci Dečjoga vrteka „Ivančice“ i negvoga područnoga tala v Radovanu, Dečji zbor „Margaretice“ z Margečana, deca z KUD-a Stažnevec, dečji folklor KUD-a Salinovec i Tancni klub Ritmo. Organizerana bu i dečja modna revija.
Dokazano omilena atrakcija za se sudionike bu tradicionalno razvlačejne i rezanje jegera v večerne vura pod „patronatom“ mesarske znalcov Industrije mesa Ivanec i pelatelskum batinum (palicom) Davora Dretara – Drelea i Andreje Loparičove. V nastavku večerke sledi zabavni program zestava Rockabilikum z Varaždina i koncert Navihanki ze Slovenije.
Sobotna događajna, 22. lipna, opiraju planinari i izletniki teri z člani Planinarskoga kluba Ivanec kreču na 3. pohod Tragom vitezov ivanovcov. Na spomen-obiležja poginulem (za jene) antifašističkem (za druge „antifašističkem“) borcem v Ivancu, Radovanu i Margečanu buju položeni venci vu povodu obiležavajna 22. lipna Dana (za jene) antifašističke (za druge „antifašističke“) borbe. Ob 10.30 v ivajnske župne cirkve sv. Marije Magdalene služila bu se svečana meša vu povodu obiležavajna spomendana sv. Iveka (Ivana) Krstitela, zaštitnika Ivanca.
Tokom dana posetiteli buju v prilike razgledati ponudu Gospodarskoga semla, čiji bu zestavni del bogata ponuda Ivajnskoga semla. Atrakcija za posetitele sikak bu i manifestacija „Ivanec kuva“ , tera počimle ob pol dan na stare tržnice vuz glazbeni vugođaj Rockabilikuma. Popodnevka i večerne vure te sobote buju bogate z kulturno-zabavnemi sadržaji: od postrojavajna i smotri povesne postrojbi do nastupa mnoge hrvatske i inozemne KUD-ov.
Ivajnski dani okončani buju (v) ponedelek 24. lipna letnem koncertom KUD-a Rudolf Rajter i nijove gostov v kinodvorane z početkom ob 19 vur.
Smotra povesne postrojbi
Ovoletni Dani grada Ivanca buju i v znaku posebne manifestacij zestanka hrvatske povesne postrojbi, kak i one z inozemstva, v organizacije Turističke zajednice grada Ivanca. Ov atraktivni dogodek odigraval bu se v subotu v središnomu parku, a posetiteli buju mogli vuživati v viteškomu turneru, mačevajnu, natecanju najbolše streličarov i drugem viteškem igram i natecajni za nagradu Malteškoga križa i Zlatnoga kaleža.
Pozdrav Europe
Vu povodu pridruživajna Hrvatske Europske unije, klinci ivajnskoga vrteka prikazali buju program nazvan „Lijepi moj Ivonjec i grazioji Litva“ , terem buju pokazali sve znajne o Litve kak članice EU-a. Delali buju Breg križov, peščane dine i slike od peska v farbe, kartu Litve i najstarešo drevo (stablo) v Europe, a bu moguče i degusterati i neka omilena litavska jela. Očekuje se da buju slične delaonice, tematski posvečene vulasku Hrvatske v EU, te den v gradskomu parku organizirale i druge škole.
Program:
http://www.ivanec.hr/Portals/0/EasyDNNNewsDocuments/917/Program%202013.pdf
Beli volki – viteška igra, povijesne postrojbe, Dani grada Ivanca 2012. , 02:36
FARINGAŠI – VERNI SE NAZAJ.mp4, 02:57
