Pregled tisKAJna
Varaždinske vesti, br. 3583, 03.09. 2013.
Piše Barica Pahič
KAJ je naše pitanje i naš odgovor
Nekaj spredelana i preširena Ezopušova basna (ona o vrane i lesice)
Špancirfest se komaj zalaufal, a več je dokončal. Male ga je pokvaril duge čakani dejž, šteri furt dojde v krive vrieme. Bar nas je prefrižal. Kaj da onda pišem o onemu kaj je prešle.
Rajše bum čitatelje pruobala male zabaviti. Nadam se da buju razmeli jenu nekaj spredelanu i preširenu poučnu Ezopuševu priču; onu o vrane i lesice.
Vrana je nazaj zašla f kvar. Nie fkrala same sir neg još pune toga i sprhnula na visoke drieve. Da skrije trage svoje raubarije, pričela je grakati kak da je najpoštenejša med semi šumski stanovniki. Onda se pod drievo dotepla i veverica.
– Koga vraga gračeš? Kaj misliš da buš s tiem prikrila svoje posle?
– Kaj te briga? Kaj ti ne kradneš? A išla si orehe krast! Bež’ od mene. Drugač ti z oviem svojim kljunom otergnem rep z šterim se tak gizdaš.
Prestrašena za svuoj rep, veverica ftihne i pobiegne, a vrana se još jakše naraši jer se pojavil zajec.
– Kaj, vrana? Kakvu si sreču dostigla gda si tu gore tak popievaš? Buš mi vuha vništila.
– Kaj je tebe briga, kosmati? Još bum i na tvoja tak nakazna vuha mislila? Liepo mi je na visuoke sverži i nišče mi nikaj nemre!
– Pa ti nišče ni ne bi nikaj štel če niesi ništ kriva i če si nie fkrala sir. Si ga morti pojiela pa misliš da se tuo ne znale?
– Proč, kosmati! Kie si ti da meni prigovarjaš? Šteta je kaj si od vuletja zrasel. Da si ostal mali kakev si se povrgel, pojiela bi te kak piceka. Z kuožu i kostmi. Ak mam ne zgineš..!
.- Več se bu našel nieki kie ti bu zel meru! Bu se i za te našla lesica.
– Če ti zletim dolje…!
Zajcu zaderše strašljive serce i pobiegne, a vrana još jakše grakne. Onda zbilja dojde i lesica.
– Čuj, vrana, liepo popevaš, ali te grdo čuti. A kak imaš liepe černe perje! – polaska ji lesica.
– Imam! – napuhne se vrana.
– Znači da si sir pojiela? Ali pazi da ti ne zestane v požiraku. Ipak se zna da si kradljivka. Si tati se v černo oblače. Če se i z fantomku zamaskieraš, svuoj gerdi kljun ne skriješ.
– Je, lesica, ti misliš da si mudra? Misliš da sem ja zbilja bedasta vrana?
– A tvoj kljun i černo perje?
– Naj mi smeha delati. Ne znaš kak ja berze i neprimetne farbu menjam. Če očem, namah biela postanem.
– Ali grabežljivi kljun nemreš zmeniti.
– Kljun? Pak si ftiči imaju kljune! Važne je kakve su farbe. Pogleč me same!
Lesica se još nie ni znašla, a vrana, čist bieloga perja, zleti z drieva, zmieša se z guskami i skup z njimi odgaca v meglu.
Zvir:
http://varazdinske-vijesti.hr/kaj-je-nase-pitanje-i-nas-odgovor/nekaj-spredelana-i-presirena-ezopusova-basna.html
i(l)
(str. 25. sim
(vezilo funkcionera morti samo ograničeno vreme)
http://varazdinske-vijesti.hr/pdf/3583.pdf
Aktuelni broj VV:
http://varazdinske-vijesti.hr/online/Main.php?MagID=1&MagNo=1
* * * * * * * * * * * * * * * * * * * * * * * * * * * * * *
Vrana vrane oči ne kopa
(Cornix cornici oculos non effodiet)
* * * * * * * * * * * * * * * * * * * * * * * * * * * * * *
Oči (vi)soko love
* * * * * * * * * * * * * * * * * * * * * * * * * * * * * *
Oči vranine sokolove
Ziga & Zlatko Vitez – Oci Sokolove, 04:02
http://www.youtube.com/watch?v=XAYhy7vitfQ
