Pregled tisKAJna
Varaždinske vesti, br. 3601, 07.01. 2014.
Piše prof. Barica Pahič
KAJ je naše pitanje i naš odgovor
Diže se istok i zapad, diže se sever i jug…
Na kraju sakoga leta naviek premišljame kak nam je bile f starem ljete, f čemu sme uspeli, a kaj sme propustili pa da v novem popravime i obavime. A zapraf je istina same tuo da sme starejši za jeno leto i da je od Božiča do Treh kraljev dien dukši za jen kukuriku-kljun. Se ostalo je same kikiriki, kak bi rekli zlobniki i zavidniki šteri ne razmeju da mi v gradnje nuevega društva ideme velikimi koraki, pogotove oni šteri su ostali bez božičnice, kaj je težeše pale vernikem (praf jim i budi) neg agnostikem.
Putni pak troški buju prosvetarem ipak berzo pali na račune, tak da moreju kam i otputovati i kaj neju same doma čubeli ciele ionak preduge zimske ferije. Zate su jake zadovoljni i, kak čujem, niesu se pridružili potpisivanju zahteva za ministrovu ostavku. (Strah je strah, veliju fpučeni f te pitanje.) Za polugodište niesu muorali decu spitivati i navlačit pozitivni uspeh pa niesu žifčani kak ranejših liet. I roditelji su mirneši. Z polugodišnjim izveščimi jim nie pokvareno Nuovo leto, pričem se misli same na informatički nepismene. A Buog naj jim se smiluje kaj jih bu dočakale na kraju školskoga leta. Kaj se pak na opčem planu događa vu Varaždinu, nieje lehke nabrojiti.
Problem smetja je zgledi ostal neriešen. Vice o temu pripoviedamo več nekaj liet. Ostaje nam da zmišljame nueve. F kulture je bile jake žive. Te koncerti, te predstave, te predstavljane knjig, pa i zbornika “Senje i meteori” štero VKD organiziera za Dan grada Varaždina, a od Grada na svečanost nišče nie došel. Kaj bi se oni s tiem zamarali! Najvekša pa je viest da je obnovljeni “Bogi Ivač”. Bar da se f kazališču imame čemu smejati. V gospodarstve se razmem same kulike se mene osobne dotikavlje gda podižem mirovinu i gda idem plačati račune ili f štacun. Nieje dobre ni seljakem. One kaj priskerbiju nemreju prodati zbog “višeših interesov” (z uvozom), a čujeju se same “spinovi” o tem kak mi ne proizvodime dost, kak sme neorganizierani i preskupi. Nemame dost svojega smetja pa uvozime i stranjske.
Neki dien si je jen stari veseljak i vicmaher gledajuč TV-emisiju o poljoprivrede, zapopieval koračnicu, jake popularnu pokle Drugega rata: “Budi se istok i zapad”, onu male veselejšu verziju (za šteru se onda išle v rešt), a glasi ovak:”Budi se istok i zapad, budi se sever i jug/ mužu su zeli kobilu, sam si bu vliekel svoj plug”. A onda je tuo prokomentieral ovak: “Kobil več nemame (ni volov) za oranje, penez za pogon traktora nemame, ali goriva za pogon motike bu seljak naviek našel”.
Zvir:
http://varazdinske-vijesti.hr/kaj-je-nase-pitanje-i-nas-odgovor/dize-se-istok-i-zapad-dize-se-sever-i-jug%E2%80%A6.html
i(l) str. 37. sim
http://varazdinske-vijesti.hr/pdf/3601.pdf
Aktuelni broj VV:
http://varazdinske-vijesti.hr/online/Main.php?MagID=1&MagNo=1
* * * * * * * * * * * * * * * * * * * * * * * * * * * * * *
Budi se istok i zapad
(v ZDA-varijante):Mameki i japeki
Sejnajne na vruče peči iliti „la Caliente Fornella“ iliti v Kalifornije)
Mamas & Papas California Dreamin’, 02:27
http://www.youtube.com/watch?v=yY9EXSDYd9o
* * * * * * * * * * * * * * * * * * * * * * * * * * * * * *
THE MAMAS AND THE PAPAS – CALIFORNIA DREAMIN (LIVE) STEREO SOUND HD, 02:55
Plavi Orkestar – Ljubi se Istok i Zapad, 03:54
Petar Brkljačić – Zbudi se draga (Krapina 2012) Nove popevke HQ, 03:59
