Pregled tisKAJna

Varaždinske vesti, br. 3602, 14.01. 2014.

Piše prof. Barica Pahič

V “javnim priopćilima” se vrte stare, več sprečitane i sprekosane viesti z male nuovih začinov da bi se dale podnesti! Velika je novost same tuo da je A. Merkel opala na diel tiela šteri je nie zgodne imenovati. Valjda se lecnula kaj je prinas vhičen Joža Perković. Ili morti kaj je mam puščen?
F sakem slučaju nieje dobre prešla. Ali najmočneješa žena svieta bu i tuo premogadila. I onda se vute vmešal slavni A. Nobilo, s čiem su se pričele vrteti i dvuejbe; je kriv pa nie kriv, bu zručen Njemački pa nebu, pa za njega vriedi zastara pa ne vriedi, pa Perković kak udbaš muora odgovarati za smert človeka šteri je v neki garaži najden z sekiru rascuopanu glavu, pa opet nie. I otkril je da su za to krivi Srbi i Crnogorci.

Ti bokca! Čovek se muora zapitati kam pa tie spada, ak se same zmislime na Jožu Boljkovca, oko čije obrane se takaj angažieral. Naviek je branil sakega kie se zove Joža. (Ne muoram vam reči šteri je trejti i najvekši Joža. Saki optuženik šteri se zove Joža, naj se odma javi Nobilu. Ziher bu dobre prešel.) Širša javnost pak morti ne zna kak bu reagieral predsednik RH. Odsuten je poradi operacije desne mige. Muoral je iti na estetsku korekciju i z lievu i z desnu migu maker je na obedva juoka furt dobre videl, ali je desne bile v zadnje vrieme male priprte pa je zgledele na njega poskrivečki namiguje, a tuo je lievu stran jake smietale. Vezda ovak vlepšani i demokratski vravnoteženi more mirne iti po nuevi mandat.

Pruosti puk se zabavlja i z šokantnu viešču da je 5 291 doktor primal mito. Nieje kažnjive same primati, neg i davati mito. Pa kaj je vutem nueve? Ali je bombastične.

Zeznali smo i još važnih viesti; da Todorić kupuje Mercatora pa valjda i onie kre našega Gruoblja. Susedi ga spominju z grdimi rečmi. Hiže su jim v opasnosti od prometa pettonskih kamionov. Nezahvalniki jedni! Kaj jim štacun pod nosom ništ ne vriedi? Viest štera nas pa je zdrmala je i tuo da je naš gradonačelnik obišel bolnicu, policiju i vatrogasce (i on nekaj dela), a dva najnovekša vhičenika, “ispitana od strane suca” (ni rečeno s koje strane suca), zbog primene EU-uhidbenog naloga, buju predana RS.

Građani pak se (praznih žepov zbog novelietne rastrošnosti) zabavljaju s preračunavanjem kulike sakega od nas koštaju političari. Si izim Jože (opet Joža) Grabarića z Ludbrega šteri je v nedelju zvlekel 277 tisučakov kun i auta i ve mu se fučka za se političare, Perkoviće, Nobile, Boljkovce, Jovanoviće, Markićke, Severine, Ćurkovičke i se druge viesti i čiče- miče.

Zvir:
http://varazdinske-vijesti.hr/kaj-je-nase-pitanje-i-nas-odgovor/
i(l)
str. 35. sim
http://varazdinske-vijesti.hr/pdf/3602.pdf
Aktuelni broj VV:
http://varazdinske-vijesti.hr/online/Main.php?MagID=1&MagNo=1

* * * * * * * * * * * * * * * * * * * * * * * * * * * * * *

Žmigavke (škilke, namiguše): Imam rada Jožeka

Navihanke / Volim Jožeka. / ( www.trekzakenzo.nl ), 03:28