Pervi put tega dneva sem vidla da gori Sarajevo, Mostar, Tuzla… Onda mi je čez dušu zapuhnul još jen opasne merzli veter.

Varaždinske vesti, br. 3607, 18.02. 2014.

Piše Barica Pahič

KAJ je naše pitanje i naš odgovor

Zapuhnul me merzli veter

No, postale je za moja vuha preglasne. Oprostila sem se od slavljenice i zešla na vulicu. Tu me zapuhnul merzli tihi vietrek i čisti zrak. Gliboke dišuči, išla sem doma, gdi sem otprla TV, pervi put tega dneva i vidla da gori Sarajevo, Mostar, Tuzla… Onda mi je čez dušu zapuhnul još jen opasne merzli veter. Male pokle tega čula sem da su naši saborniki, v okolnosti da v Hrvatske ima 380.000 nezaposlenih, odbili priedlog da si male zmenjšaju plače. Onda sem se zmerzla.
Negde f sredini preteklega tedna male je popustila zima. Ljudi su pričeli hoditi po gradu bez vekšega straha da jim se bu posmeknule i našli se na traume. Pričeli sme posečivati i kojkakva kulturna dogajanja.

F četrtek 6. veljače bilo je v Gradske knjižnice “Metel Ožegović” predstavljanje pesničke knjižice Ljerke Fajt “Srce otvoreno pjesmi”. Knjigu je predstavljala prof. Ružica Marušić-Vasilić, pesme su čitale autorica, Ružica Juras i Vesna Pravica. Za glazbeni program pobrinul se prof. Ivan Mežnarić, šteri je i sviral i popieval i šteri je stalni korepetitor Valentini Geci, pevačici od čijega soprana su i knjige v ormarima Studijske čitaonice zadrgetale. Bile je liepe i svečane, a autorica, štera f vnogimi pesmami skazuje pesimizam i navešča smert, na kraju je, gda se zahvalila siem šteri su ji oko knjige pomogli, rekla da tuo ipak nie njena zadnja knjiga i s tiem optimistične nasmejala brojnu publiku.

Drugega dneva, 7. veljače, bila sam pozvana na još jenu svečanost, na otvorenje izložbe slik v kafiču “Mea culpa”, a priredila ju je još jena Gecika, Margareta Geci, gopodična štera o tekstilne struke predaje na Gospodarski školi, ali se amaterski bavi i slikarstvem. Ona je po zidima “Culpe” izložila jene deset slik na šterimi prikazuje mačke, se z jednak zdignjenim i zavijenim repekom. Razlikujeju se same po deržanju i izrazima lica. Jasne je da one niesu same mujce; liepe, mazne, vmiljavajuče, prefrigane, negde i podmukle i opasne (gda zvlečeju svoje parklje na šapami), tak da tu ima nečega ezoteričnega, simbolizieraju se kaj znači ženskost i ženstvenost. Margareta je onda objavila da s tu izložbu slavi i svuoj rođendan. (Nebumo rekli šteri jer onak liepa, tienka i na visuoki petami zgledi kak da ima osamnaest.)

Kafič je bil prepun mladeži štera je razgledavala slike, poslušala i popievanje Margaretine prijateljice i glazbu opčenite. Bile je i nekaj starieših ljudi z šterimi sam se i ja mogla spominati. Tak sem v ta dva dneva doživela i uobičajene i moderne i baš sem se dobre osečala.

No, postale je za moja vuha preglasne. Oprostila sem se od slavljenice i zešla na vulicu. Tu me zapuhnul merzli tihi vietrek i čisti zrak. Gliboke dišuči, išla sem doma, gdi sem otprla TV, pervi put tega dneva i vidla da gori Sarajevo, Mostar, Tuzla… Onda mi je čez dušu zapuhnul još jen opasne merzli veter. Male pokle tega čula sem da su naši saborniki, v okolnosti da v Hrvatske ima 380.000 nezaposlenih, odbili priedlog da si male zmenjšaju plače. Onda sem se zmerzla.

Zvir:
http://varazdinske-vijesti.hr/kaj-je-nase-pitanje-i-nas-odgovor/zapuhnul-me-merzli-veter.html
i(l) str. 35 sim:
http://varazdinske-vijesti.hr/pdf/3607.pdf
Aktuelni broj VV:
http://varazdinske-vijesti.hr/online/Main.php?MagID=1&MagNo=1

* * * * * * * * * * * * * * * * * * * * * * * * * * * * * *

Jerko Fabić – VETER PUŠE HQ, 04:03