Ova “kukuriku” vlada je stopram na “pol pota”, a mi več zdehavlemo, več nebremo, kak nam je Slavek fest stegnul remene.

Polarizerajuče očale

* * * * * * * * * * * * * * * * * * * * * * * * * * * * * * * * * * * *

Međimurske novine, br. 962, 21.02.2014.
e-vundano 24.02.2014.

Piše: Jožek radnik

Premišlavanje Jožeka radnika

Minister Slavek Liničov, a i jegova Porezna uprava furt mislijo na nas, tak da nebrete nikaj niti z nosa skopati, a kaj ne bi na to platitli poreza. Ova “kukuriku” vlada je stopram na “pol pota”, a mi več zdehavlemo, več nebremo, kak nam je Slavek fest stegnul remene. Moral nam je nejpredi dati posla, a onda zeti peneze, ali posla i plači nigdi, a Slavek i jegovi vse vejč očejo, jim nigdar dosti. Brzčas smo se ne za takšo Lejpo našo borili!!???

Milanka Opačič je, kak zgledi, prestala živeti kak obični ljudi na minimalco, očem reči, spustila se na zemljo, pogledala običnim ljudima v oči i rekla, a da je ne niti trepnula z  okom,  kaj i kak dela “kukuriku” vlada:
– da smo rekli (pred dve leti) kak bodemo uveli fiskalizacijo nišči nam je ne veruval, a mi smo to napravili,
– da smo rekli kak bodemo naprajli reda med onima šteri dobavlajo socijalno pomoč, a po njo hodajo z beemvejima ili pak merđijima, i da bodemo za vsega par sekundi znali što kaj od jiv ima, a i to smo naprajli ( Zna se sam ono kaj je nešči prijavil, ali ne i vse kaj ima),
– još lani smo vam rekli da bodemo, vtruc ovoj velikoj krizi, štera nas več pet let duši i praznoj državnoj kasi, kupili 1580 novih autov, nišči je ne veruval, ali morem vam reči da bodemo i to napravili!

Minister za vrtece, deco, tete, škole, školarce, navučitele, navučitelice, športaše i labodoritaše, Željkec Jovanovič je, brez srama, priznal kak je ne došel v politiko kaj se bode na kočiji vozil. Drugi den se je vgrizel za jezik (ili pak ga je Zoki zašpotal), pokril se z vuhima po glavi i lejpo je priznal da nema nikaj protiv kočije, ali ne one z dva konje, nek one z tristodva i z olimpiskim jarmom. Pak valjda on kak minister vredi bar tuliko kak sisačka županica Marina Merzel!?

Za vreme poplave v Sisko precednik vlade, Zoki Milanovič obišel je poplavljene, a županica Marina je furt bila polek jega. Vsi znamo da jo je,v zadje vreme dosta šinfal, ali kak zgledi vse joj je šenkal, očem reči, pregledal črez prste. Vsi znamo da je Slavek Liničov Marinin venčani kum, a ne Zoki, ali kuliko Zoki čita Sveto pismo i popevle psalme, brzčas se prepravla za fermanoga kuma. Jako sam najgerek je li je Slavek na ljubosumen kaj je Zoki vsako malo pre jegovoj kumi?

Na pol mandata “kukurikači” so podnesli račune o tomo kaj i kak so delali. Vlada i vsi ministri so se stali pred veliko zrcalo i vsi, kak jeden, so zapitali: Ogledalce, ogledalce, reči ti nam što je nejlepši i nejbolši vu Lepoj našoj? Zrcalo je sam čkomelo i čkomelo, a unda so počele vum iti črne “šestice”, a žnjimi je kormanila Marina.

Naš međimurski župan, Matek Posavec, pravzapraf prodavle službenoga beemveja. Nej znati je li ga bode prodal jerbo je na jega zakelil preveliko ceno. Mortik se nešči najde komo vredi tuliko jezerač kuni kuliko župan kani dobiti?

Ovozemaljska životna sveča serjančara Rajkija Majsena z Hlapičine je dogorela v pedeset i drugomo leti. Dok se je hapil Domovinski rat Rajko se je ne skrivačkal kak kaj što od nas, nek je odišel, z puškom v roki, borit se za Lejpo našo. Duže od tri leti je išel z front na front, z bitke vu bitko, tak dugo dok je agresor ne pretirani i Lejpa naša oslobođena i zafremana. Vsi znamo da je od rata minulo skorom dvajsti let i da so se vsi braniteli i heroji v rato ne jednako uspešno znašli i vu miro. Jeden od takših je bil i Rajko. On se furt nadjal da mo bode Lejpa naša vrnula duga i da bode mogel, zato kaj je bil v rato, delati i od svoje plače živeti. Niti je dobil stalnoga posla, niti je dobavljal pomoč kak bi mo se šikalo, ali je zato zbetežal i bolest ga je posprajla v grob. Još jeden šteri se nadjal da bode država za štero se boril vrnula svojega duga isto onak kak je on išel, z puškom v roki i z glavom vu taški iz bitke vu bitko. Još se jempot pokazalo da sloboda nigdar ne popevle onak kak so branitelji popevali o njoj i kak so je z žarom srca čakali i izborili. Kak mi ljudi fletnjo pozabimo onoga što nam je pomogel v nevoli. Još jempot se skazala ona istina da so heroji v rato ne i heroji v miro: jedni v rato dobavlajo bitke, a drugi delijo slavo ( i vse drugo) pobjednikov. Rajko je tak malo iskal, a i to malo smo mo ne znali ili ne šteli dati.

Makarska i Trogir  so zaklajeni z smetjom i ne znajo kam bi žnjim. Vse oči Dalmošov bile su vuprte v Gorčan (vuprem oči vu to kompostano gorčansko) i to celo minulo nedelo, ali so jim Gorčanci zeli i zadnjo nado, tak da ne bodo mogli svoje smetje voziti v Gorčan kak so se nadjali. A i sosedaj Varaždincaj je v pipi vgaslo tak da si bodo morali iskati novo žrtvo, šteroj bodo mogli uvaliti svoje “brege” smetja. Verjem da znate kak je v minulo nedelo bil prvi opčinski referendum v Lepoj našoj na šteromo so Gorčanci bili protiv kompostane štero je jiv načelnik šte, z oka ili boka, zrivati na gorčanski hatar. Na lanjskomo referendumo v decembro so Gorčanci glasali ZA, a ve pak so bili PROTIV, tak da ve opčinski načelnik zna kaj jegovo biračko telo misli. Nigdar so Gorčanci ne bili tuliko na televizije kak ove dneve. Nekaj jim se načelnik fest zameril da so vsi bili protiv jega i jegove kompostane???

Minulo soboto so v Čakovco bili tri ministri, Branko Grčić, Siniša Hajdaš Dončić i Ranko Ostojić. Došli so skrivečki brzčas zato, jerbo so se dopelali v staraj autaj, a spominali so se sam z esdepeovcima. Kakši so to ministri kaj se skrivačkajo od novinarov, a i od svojega biračkoga tela? Pak smo jiv i mi Međimorci zebrali kaj so došli na vlast, makar ne vsi. Kak se moremo nadjati nečemo dobromo od ljudi šteri se skrivlejo pred nami i ne vupajo nam v oči pogledati? I to na našemo hataro. No, stopram so na “pol pota”, pak se još ftegnejo poprajti.

Makar se kriza još navek navelikom šerpuri, kak po Lepoj našoj, tak i po Međimorjo, ali nebremo i nesmemo nikak veruvati kak so nam vse lađe potonule i kak so nas vsi pozabili. Najme kaj, minister Slavek Liničov, a i jegova Porezna uprava furt mislijo na nas, tak da nebrete nikaj niti z nosa skopati, a kaj ne bi na to platitli poreza. Ova “kukuriku” vlada je stopram na “pol pota”, a mi več zdehavlemo, več nebremo, kak nam je Slavek fest stegnul remene. Moral nam je nejpredi dati posla, a onda zeti peneze, ali posla i plači nigdi, a Slavek i jegovi vse vejč očejo, jim nigdar dosti. Brzčas smo se ne za takšo Lejpo našo borili!!???

Zvir:
http://www.mnovine.hr/novo/index.php?option=com_content&view=article&id=25712:stopram-so-na-qpol-potaq-a-mi-ve-nebremo&catid=301:joek-radnik&Itemid=575
i(l) str. 56. sim:
http://issuu.com/mnovine/docs/mnovine962i
i(l) str. 56. sim:
http://www.mnovine.hr/images/pdf/962/mnovine962i.pdf

Na “pol pota”: saka sličnost kukurikavcov z Pol Potom (ne)je  slučajna za (ne)simpatizante kokoduckavcov.

Gusti Draksar i Skandal bend – Stopram sam se oženil – Lijepom Našom 2013. u Čakovcu, 03:24