Ovolietni Fašnik nam je bil pervi od kak sme v Evropski uniji. Lani sme se nadali semu pune bolšem. A gorše je; več nezaposlenih, več podobnih, veče ciene, porezi i PDV, a menjše plače.

Varaždinske vesti, br. 3609, 04.03. 2014.

Piše Barica Pahič

Ovolietni Fašnik nam bu pervi od kak sme v Evropski uniji. Lani sme se nadali semu pune bolšem. A gorše je; več nezaposlenih, več podobnih, veče ciene, porezi i PDV, a menjše plače. Ali Fažnik bu nam liepši. Smieme (če smieme) rabiti navike slobodnega svieta. Diela se npr. o tem da smieme za Fašnik delati i nositi, med onemi štere sme i dosad nosili, i larfe (maske, obrazine) naših denešnjih političarev.

Tak je i vu velikem svietu. Zmislite se same na one od Blairea, Mitteranda i Busha npr. Čuje se da larfe naših političarov ljudi kupujeju kaj nori, a radionice larf su još f punem pogonu. Promet je veliki. I prihodi za deržavu buju vekši. Ni političari (porezniki) niesu protivni. Penezi su penezi otkud god dohajali.Več su najdeni prototipi larf denešnjih i bivših precednikov deržave i Vlade, ministrov sieh fela (a je jih) pa sabornikov, a na redu su i kojkakve druge face (od Severine do Ace). Kojčemu se domišlja pri nacrtu, pri režije fašničke “prešencije” i pri izboru fašničkih kostimov. Još se šivljeju. Veliju da bu zanimljivejše neg na maškeradi v Riju.

Predviđa se da bu na čelu kolone (jel’ se bu se peljal ili peške išel?) Cezar z zlatnim lorbekovim viencem z dvie pratilje; jena f kostimu Kleopatre z filma “Antonio i Kleopatra”, a druga f one čeljene kiklje Scarlet O’Hara z filma “Prohujalo s vihorom”. Čije larfe buju nosile, znale bu se na vrieme. Za njim se bu v starorimske kočije vozil jen bog vina i veselja (onie z grčke mitologije) nakinđan z liščem z trsja, do pasa guoli, a na glavi s krunu od rožja štera bu asocierala na Kristuševu krunu i simbolizierala muke pobirača poreza. (Preporuča se vlastita režija veselja i smieha.) I on bu imel dvie pratilje; jenu f modernem kostimu (marka kostima, broš i larfa po volji), a druga pak f kiklje Merilinke z filma “Sedem liet vernesti”. Izvesne je da bu dotičnjaku (čiju god masku nosil) pod nogami ležeča odaliska f obleke i larfe Vesne Balenović.

Sliedili buju oni z obrazinami bivšega i denešnjega vrhovnega policajca v bratskem zagrljaju, a za njimi, več po važnesti, drugi viđeniji ili skriveniji od javnesti. Visuoki izvor naviešta da se nešterne osobne buju pojavile demaskierane, f kostimi štere ve nosiju (v reštu ili f pripravi za rešt). Pojavil bu se i King Kong. Za njega se predviđa ritualne skidanje maske (meste kurenja Fašnika). Tuo još nie potrđene pa s tiem najte kalkulierati.

Maske rasporedite sami. Morete se spustiti i na lokalnu razinu. Dajte si mašti na vuolju! Naša maškerada bu male duže trajala.

Zvir:
http://varazdinske-vijesti.hr/kaj-je-nase-pitanje-i-nas-odgovor/nasa-maskerada-bu-male-duze-trajala.html
i(l) str 35 sim:
http://varazdinske-vijesti.hr/pdf/3609.pdf
Aktuelni broj VV:
http://varazdinske-vijesti.hr/online/Main.php?MagID=1&MagNo=1

* * * * * * * * * * * * * * * * * * * * * * * * * * * * * *

Fašnik 2014, Velika Gorica, KUD Mičevec, 10:13