Što drugi nam bode dopelal sonce med te naše vsakodnevne sive oblake, što nam bode rezvlekel obraze v smeh i veselje ak to ne bode napravil naš Fičo. I to ne bilo kakši, stari, nekša krnitja, nek naš Filip Ude – Fičo. Pred šest let je donesel z Kine srebrno olimpisko kolajno, a i v ove dneve je, isto tak, z Kine dovlekel srebrno kolajno, ali svecko. Verjem da to znate, vse te medalje je osvojil z svojim konjom na šteromo več na leta jaše. I to ne bilo kak, nek nejbole na sveto.

* * * * *

Međimurske novine, br. 996, 17.10.2014.
e-vundano 20.10.2014.

Piše: Jožek radnik

Što drugi nam bode dopelal sonce med te naše vsakodnevne sive oblake, što nam bode rezvlekel obraze v smeh i veselje ak to ne bode napravil naš Fičo. I to ne bilo kakši, stari, nekša krnitja, nek naš Filip Ude – Fičo. Pred šest let je donesel z Kine srebrno olimpisko kolajno, a i v ove dneve je, isto tak, z Kine dovlekel srebrno kolajno, ali svecko. Verjem da to znate, vse te medalje je osvojil z svojim konjom na šteromo več na leta jaše. I to ne bilo kak, nek nejbole na sveto.

Dočakali smo ga znova na glavnomo čakoskomo placo, neje nas bilo tuliko kak pred šest let, ali smo ga jako lepo dočakali. Bilo ga i čuda dece, štera so došla z svojimi starci. Jeden malac je pital japo (ili pak japico): A gde mo je konj? Zakaj je ne došel i z konjom? Nej sam uspel svoje vuho porinuti tak blizo kaj bi bil čul kak je japica opravdal Fičija. Fičo je bil vesel i zadovolen i vsima nam je lepo obečal da mo je dosti toga gimnastičkoga srebra i da se z konjom dospomenul da ve ido na zlato. Neje to ruom vse tak. Najme kaj, uspel sam zazvediti da je gospođa Ana, Fičijova bolša polovica, več ne zadovolna z srebrom i da bi štela zlato. Znamo vsi mi da je ženam furt zlato na pameti, a ženina želja je i za Fičija zakon. No, pustimo šalo na strano, ali to kaj je Fičo napravil to more malo što na sveto. Vsi znamo kakše je probleme Fičo mel s zdravičem posle srebra v Pekingo, a i koj ga je parpot vritnul, ali malo je tak trdoglavo upornih kak je Fičo. Kaj se upornosti dotikavle najbrž so mo i osleki jalni. Fičo, vsaka čast, poklonec i kapa do zemle.

Preveč je vroče i za Miholjsko leto ili kak se to štacunski veli, babje leto, pak se to pozna vseposot. Ne sam da nam je vroče, nek so nešterni i zakuhali i to ve v oktobro jerbo so zbogradi dežđa to ne mogli celo leto. Te jesenske vručine, sparine i južine so ne uspeli zbeči niti naši političari. Nejhuje so prešli KK (čitaj: kukuriku kompiči) političari i to naši međimorski. Da čovek ne poverje da so se naši domaći političari spominali prek nišana na istinabožek puški lufterici. Nesam baš siguren je li so se posvadili precednik županiske skupštine, gospon Mladen Novakov i župan, gospon Matek Posavcov, ili pak je do svaje došlo med partiskim i stranačkim prvakima, a v čemo so nejglasneši bili, precednik međimorske partije, drug Mladen Novak i prvi čovek međimorskih haenesovcov, narodnjak Matek Posavec. Makar je te den, te četrtek, bilo vedro i sunce je svetilo po celomo Međimorjo kak da smo mi Međimorci ne nikomo nikaj dužni i kak da smo vrnuli vse duge za bolnico, a v županijski večnici je vse iskrilo, očem reči, grmelo je i blesikalo se kak v septembro dok se je dežđ ne mogel (ili ne znal) zastajti.

Na svetlo dneva je došel i spominek Mladena i Mateka šteroga sam ne nejbole razmel. Najme kaj, nesam bil siguren je li je bil v pitanjo Matek kak balavec ili pak je on derište, kakšo mo je cono prikelil Mladen. Kak jeden čovek nebre vse znati, tak se niti ja nebrem restrgati, pak sam v pomoč pozval vse one šteri vejč znajo od mene, a to so: rečniki (domaći i stranjski), enciklopedije, Internet i sosedo Franco. Nebrem si to oprostiti, ali nekak mi je pobeglo kaj sam se ne ftegnul pospominati z čakoskim Guglinom pre gracki vuri. Vsaka čast vsima, ampak mi je teca Franca nejbole pojasnila što je to balavec, a što pak derište. Veli Teca: balavec, pak to ti je naš šmrklavec, posranec ili pak žvalavec, nešči mladi, šteri još vse ne zna, a derište to ti je dete bez reda, štero se furt duri i z drugih norca dela, kak dinamovec Zdravko Zagreba. Ve vse znamo ili se nekak gruntamo da znamo, kaj je Mladen pravzapraf štel reči Matiji. Labodoritaškim rečnikom rečeno, tre to političko lopto spustiti na zemljo i nek se dečki pospominajo ak očejo kaj jiv KK opstane v ligi.

 Nekaj vam ja tu ne razmem, ravnatelj naše Hitne je ne zebrani jerbo je SDP-e ne dal svojega blagoslova doktoro Novinščako. A neso ga niti težaki blagoslovili. Ne bi se štel mešati, ali brzčas je to nekaj novoga da v kapitalizmo proleteri zbirajo svojega gazdo, očem reči, šefa. Napriliko, v Međimorskaj vodaj so težake ne nikaj pitali. Isto tak vam ne razmem kaj se gospa z Vararaždina srdi kaj je ne zebrana, a mela je vse papere, šteri so se iskali. Najbrž bi mi Međimorci morali mam zebrati nekoga prek Drave, očem reči, Zagorja što se javi za šefovsko foteljo prinas v Međimorjo. Tak je bar do ve bilo prinas v Međimorjo, pak je unda Zagorcima čudno ak se te šege i dale ne držimo. Znate kak smo mi Međimorci nevek pripovedali: Nek bode šef Zagorec sam kaj ne bode moj sosed, prijatel. Ne moram vas zmišljuvati da je tu v pitanjo naš međimorski jal, šteri nam je v genima i šteroga se nikak nebremo rešiti.

Nebrem to razmeti kak se igrači v našoj međimorskoj, očem reči, županiskoj KK nebrejo dospomenuti okoli duga za bolnico. Mesto kaj bi glave deli skup i drukali v Zagrebo pre Milanovićo, Lalovco kaj nam naša mačehinska Vlada reši toga duga za bolnico, a to nam je za Den županije gospa potprecednica Vesna i obečala. Ne, esdepeovci to koristijo, z figom v žepo, i očejo zrušiti Mateka. Mi smo tak bogati, imamo tak čuda penez kaj moremo platiti i teh osem, devet milijonov za bolnico. Pak ne moram vam vsaki den ponavljati kak smo si mi Međimorci vejč od pol bolnice sami napravili, a kaj je nikomo v Lepoj našoj niti na pamet ne palo i bilo bi čistam vredo da nam Vlada nekaj vrne, a ne kaj mi hodamo, mislim tu na esdepeovce, v Zagreb nagovarjat ministre nek nam ne pomorejo. A ministri to debelo koristijo i norca se delajo z nas i to mam čim zapremo vrata. Morem vam reči da je to preveč i za međimorski jal. Pak je ne bolnica Matekova, pak so ne penezi Matekovi i kaj se mene dotikavle čistam mi je vsejeno z šteroga žepa pejo penezi vum, sikak bodo falili v županijski kasi.

Pobrali smo grozdje. Kakše je bilo takše smo pobrali, a mošt je, v lagvima, več odbrundal vse ono kaj je znal i kaj se je navčil. No, neje još zrel za, navek žene, požerake naše. Mora još malo čkometi, čuseti v pelnici i počakati svetoga Tinčeka kaj ga bodemo mogli donesti na stol. Mel sam nekaj za čuti da se je grozdje bralo i po pelnicaj. I to po noči, pod svetlom. Svetil je mesec, ali sam tatima jerbo so gazdi stopram vjutro vidli da jim je nešči otpelal par toni grozdja. Kak je mesec nikomo ne rekel što je bil na bratvi v nočni šifti, tak da bode najbrž nejvekši međimorski tat, nepoznati počinitelj, završil na sodo ak ne i v rešto.
Zvir:
http://www.mnovine.hr/kolumne/Jožek%20radnik/1/Fičo%20pak%20jaše
i(l) str. 56. sim
http://issuu.com/mnovine/docs/mnovine997i
http://www.mnovine.hr/informacije/2/issuu.com/mnovine

Nomen est omen:
Filip = Fil–hip = kojnolubec (na prastaro grklanskomu)
* * *
gimnastika = golijada (grčki gymnos = gol)

Crne strele – Vec tri dana jasem ja z Varazdina.wmv, 02:46