Čije si ti gore, moj potencijalni idole, list? / Gore i-dole

Neki su mislili da se gospon bivši i Kolinda zalažeju za iste: za pravdu, jednakest, gospodarski napredek i domoljublje npr. Tak je zgledele da je sejeno kie bu zebrani, ali se ipak postavljal pitanje s čije je kie gore list.


* * * * * * * * * *

 

Varaždinske vesti, br. 3657, 03.02. 2016.

Piše prof. Barica Pahič

KAJ je naše pitanje i naš odgovor

Čije si ti gore list?

V onem razdoblju med dvemi izbori, zgledele je da oboje kandidatov govoriju iste. Gospon bivši je prevzel Kolindinu domoljubnu retoriku, a ona je nastavila po svojem. Neki su mislili da se zalažeju za iste: za pravdu, jednakest, gospodarski napredek i domoljublje npr. Tak je zgledele da je sejeno kie bu zebrani, ali se ipak postavljal pitanje s čije je kie gore list. Nie su vidli razliku, neg su se pozivali na poučne iskustve kie je kaj napravil i na veru kie bi mogel drukčeše i boljše napraviti. I zate je se bile tak neizvesne, maker se vnapre znale kie je s čije gore list i kakvi vetri z nje pušu. Ipak je došle iznenađenje.

Vnuogi su opali na rit (ne budi gerde reči) zate kaj je najbolj omiljenem zmenjkale par tisuč glasov za štere je premogla protivnica. Pervi su se, još onak omegleni od poraza, mam pričeli odricati od onega kaj su govorili. A zakaj je postavljane onakve pitanje? Valjda zate kaj su Hervati po svietu rastepeni kak listje štere veter raznese. A kojkakvi vetri su jih po svietu rastepli. I baš uvređeni su se osetili „oni“ zate kaj su za vrieme izborov največ bili na rešetu.
Još več pak Hervati susedne deržave šteri prinas ne plačaju poreza. Viš vraga! I tu su opale rieči štere ni pes z maslom nej pojel, a ti su tuo otčitali kak rasizem prema vlasitem narodu. Znemirili su se i oni šteri z svieta v Hrvatsku pošiljaju peneze da bi njihova rodbina mogla preživeti.

Ali ve se naglašava da su za bivšega bili urbanizierani, napredni i civilizierani, oni z asfalta, a protiv – selski, menj napredni. Zgledi da je jenemu žal kaj ciela Hrvatska još nema asfalta. a tuo je ipak njegev propust.
Da je več Hrvatske asfaltieral, morti bi denes gospon Hajdaš, udati Dončić (tak se šaliju na njegev račun) imel več tega za dati f koncesiju. A zadovoljnejši bi bil i naš varaždinski župan šteri se zbilja more pohvaliti da je njegva županija vglavnem asfaltierana i urbanizierana (ima gradov kaj listja) pa je ostala vierna bivšemu. Ali kaj je, tu je.

Bila sem se poveselila da sme konačne si Hrvati v domoljublju, brige za gospodarski oporavek i za nezaposlene vjedinjeni. Ma kakvi! Ništ od tega! Isti vetri pušeju i dalje, ak nie i gorše, pa je gosn Pupovac, naviek jake važni faktor, pričel znuovič frfljati o ustašami, a nekšni Črnogorec zvisoka poručivati Kolindi naj mienja retoriku. Veliju; „ne kondicionalno, nego imperativno“. jer da je Srbe preimenovala v Hrvate. Nafčil se človek zapovedati, a navika je navika. I onda se ljudi pitaju s čije je on gore list.
Ja pak znam s čije je on, a s čije ja. Same listek.

Zvir:
Str. 23.  sim
http://varazdinske-vijesti.hr/pdf/3657.pdf
Aktuelni broj VV:
http://varazdinske-vijesti.hr/online/Main.php?MagID=1&MagNo=1

* * * * *

Listek mi je došel, 01:35
Narodna Družina RT Zagreb cca 1963
Popevke Prigorja i Zagorja