Liepo mi je majka rekla da zemem samo malo kaše z torbice, a jô sem svu kašu oprala i diela kuvat. Pitaj dragoga Boga, de mi je bila pamet…

* * * * * * * * * *

VGdes
VGdanas, 15.01.2015.
Broj 058, www.vgdanas.hr

JOŽEKOV ČOŠEK
RIČET (jagli, ječmena kaša)

Liepo mi je majka rekla da zemem samo malo kaše z torbice, a jô sem svu kašu oprala i diela kuvat. Pitaj dragoga Boga, de mi je bila pamet…

Taj dôn je majka otišla kopat kukuruzu. Zdigla se rano, još za mrôka, zela je motiku, flašičku z vodum i otišla.

Dôn prije, rekla mi je da bum jô zutra kuvala ričet. Navek mi je govorila: „Kad se vudaš (otideš zumuš) jednoga dôna i ak dojdeš v hižu de je huda svekrva, a nebuš znôla kuvati, saki dôn te bu klela i špotala“.

Priredila m je vrečice z bažulom i z ječmenum kašum.
Zebrala sem liepo bažul i oprôla ga. Dela sem ga kuvat. K bažulu sem narezala luka, merlina, celera, špeka, pak sem sé to posolila i pobiberila.
V drugom loncu je kipela voda i nutre sem nasipala opranu ječmenu kašu. Za pol vure, ta se ječmena kaša tak „napuhala“ (napunula), da lonec f teromu  se kuvala, više ni bil dosta veliki; sem kašu zesipala u veči lonec i pridôla vode.
Pôk je prešlo pol vure, ali ni taj vekši lonec ni bil dosta veliki – kaša je samo rôsla  i rôsla. Zela sem treči (trejti) lonec i pôk vujnega presipala kašu i pôk prilejôla vode.
Kad sem se okrenula oko sebe, imela sem kaj videti. Svi lonci su bili od kaše, više v kredencu ni bilo niti jednoga. Nu, na moju sreču, bažul se skuval. Dela sem vujnega malo skuvane ječmene kaše  i napravila zafrik.
Ali, Bože moj, am je te kaše još tuliko ostalo, tak puno da bi bilo dosta za cielu vulicu. Ajoooj, a kam bum sad žnum?
Zela sem lonec s kašum, žlicu i otišla na dvorišče. Kašu sem dôla kokóšami, racami i môčku, a ono kaj je ostalo sem hitila na vrt.
ómm
Majka se oko pol dôn vrnula s pola i liepo se najela ričeta (jaglof). Bil je dober il je ona bila jôko glôdna. Ali, kad je otišla vôn da s pumpe donese mrzle vode, imala je kaj videti: kuvane ječmene kaše bilo je po cielomu dvorišču.
Môček se kaše tak najel da su mu oči postale pučkaste. Ne bilo druge, nek je zela lopatu, pobrala kašu po dvorišču i hitila ju na gnoj.

Liepo mi je majka rekla da zemem samo malo kaše z torbice, a jô sem svu kašu oprala i diela kuvat. Pitaj dragoga Boga, de mi je bila pamet… Majka me prijela za šišek i malo stepla. Je, tak je to bilo, nigdôr to nebum pozôbila. Sva je sreča da mi se to dogodilo kak curičke. A kaj bi bilo da sem pri svekrve skuvala tak puno ječmene kaše? Gundrala bi i čavrala i špotala bi me po cielomu selu.

* * * * * * * *

KUD Bukovac – Stal se jesam, 03:47