Fala ti, Božek kaj sam mogel videti Ivija
kak odhaja z Pantovčaka i Kolindo, štera mo je mahala /

Međimurske novine, br. 1015, 27.02.2015.
e-vundano 02.03.2015.

Piše: Jožek radnik

Fala ti, Božek kaj sam mogel videti Ivija
kak odhaja z Pantovčaka i Kolindo, štera mo je mahala,
fala ti, Božek kaj videl sam te osmeh šteri ostaja
i regionalisto, šteri odhaja

Mi Međimorci se još navek spominamo za novo lepo precednico i jeno inauguracijo i to vse zbogradi naše stare međimorske pesme “Dej mi, Božek, joči sokolove.”, štero je na Markijovomo Trgo popevala Renata Sabljak, jerbo ak ga nas več ne v svetešji pesmi, očem reči, himni Lejpe naše unda smo srečni kak črveki kaj je precednica mislila na nas dok je dohajala na Pantovčak makar smo mi jako slabo ili skorom nikak ne mislili na jo dok smo hodali glase davat. A kaj se more, mi smo, kak biračko telo, zahuzali kaj se Kolinda dotikavle, a ona još navek računa na nas. Kak je to lepo da znamo da nešči misli na nas makar smo mi to ne zaslužili. To vam je tak kak i moja soseda Barika, furt se mota po moji glavi, furt si gruntam o joj, a ona niti da hiti oko na mene, a kamoli da si ga počine na mojemo telo, nek ide polek mene kak polek turskoga groblja. No, pustimo sosedo Bariko nek ona ostane tam de je je, a mi pak se bodemo vrnuli našoj staroj međimorskoj pesmi malo predelanoj za ovo priliko:

Fala ti, Božek nejpredi za naše malo Međimorje,
fala ti, Božek za Lejpo našo,
fala ti, Božek za joči sokolove,
fala ti, Božek kaj sam mogel videti Ivija
kak odhaja z Pantovčaka i Kolindo, štera mo je mahala,
fala ti, Božek kaj videl sam te osmeh šteri ostaja
i regionalisto, šteri odhaja,
fala ti, Božek za joči sokolove.

Nekak je čudno završilo minulo leto prinas v Međimorjo, očem reči, v Strahoninco. Tam je več v decembro započela korizma. Najme kaj, tam so se esdepeovci odrekli “seljakov” v Adventu, to je vreme darivanja, a strahoninski opčinski večniki so svojega načelnika nagradili z nogom v rit. Ve so na redo Strahoninčari kaj početkom marcijuša, na pol korizme, rečejo je li se slažejo z esdepeovcima ili pak bodo haesesovco Franceko produžili mandat. Jako sam najgarek kaj se bode itak pripetilo ak bodo Strahoninčari svoje glase dali Sanji, a Strahoninčarke Franceko? Unda bode prinudni upravitelj, gospon Posavec, tam duže na kvarteljo!

Nebodete veruvali, ali nešči je v čakosko gracko kaso uplatil 3 milijone kuni i razveselil grackoga načelnika Štefa. Morete si misliti kak se je zavinula polica v grackoj kasi, štera je navčena kaj tulikši penezi najempot dojdejo v kaso. Mam je gracki hižni mešter (čitaj: ezermešter) moral mejati polico. Dugo se je skrivalo što je bil te Ded Mraz. Niti gracka financ ministrica Lidija je ne uspela zazvediti što je to itak sranil svoje peneze v gracko kaso. No, na vse zadje se je, ipak, zazvedilo da so te penezi došli z Bugarske kak bi se stoprocentno zacementerala pajdašija našega Čakovca, grada cvetja i dece i jivoga Blagoevgrada, grada cvetje i študentov. Nekak smo se fest dopali Bugarima i Bugarkaj, a vidli so sam naše gracke oce, očem reči, tri kralje, kaj so se tak razbečarili. Kaj reči, dobro smo se prodali!

Priločanci nikak da dojdejo na zeleno kito z našom Vladom i jivim šefom Zokijom. Što jim je kriv kaj so tak visoko odleteli, očem reči, čuda više nek vsi drugi v Lepoj Našoj, pak imajo premalo težaki na burzi dela i ve nebrejo dobiti tuliko težaki za javne posle kuliko nucajo. Kaj so pozabili da on čavel šteri strči preveč visoko navek dobi po gopco, pak so tak ve i oni zišli. Nebrejo nikak računati kaj bodo oni i dale v državnoj cukor-piksi jerbo je te preločki čavel hadezejov, a hamer šteri tuče esdepeov. Ovak so Priločanci preveč visoko, a ve bi šteli kaj bi jif država i dale pomagala kaj bodo još više leteli. Dobro so si ovi v državi pregruntali jerbo ak bi Priločanci preveč visoko odleteli što bo jim do nosa dosegel?

Hrvaški sabornik, Srbijanec ne svojom krivnjom, Milorad Mile Pupavac, je donesel v Sabor selotejpa onoga dneva dok je Branimir Glavaš, šteromo je hrvaški Ustavni sod poništil presudo i robijo od deset let za ratne zločine, došel z Mostara pogledati sabornico v Zagrebo i kaj se malo pospomina z negdašjim pajdašima sabornikima. Mile je štel vsima reči kak je Glavaš optoženi i kriv za “Slučaj salotejp” i lejpo nas je vse podučil kak se selotejp dela kaj bi koristil čoveko, a nešterni ga (mislil je tu na Branimira) nucajo za čistam nekaj drugo. Ali je Mile pozabil da i deca dohajajo na of svet stvorjeni na sliko i priloko Božekovo i to zato kaj bodo delali dobra dela i kaj bodo služili Božeko i ljudima i neje važno na šteroj so strani Dunava rođeni. A nešterni, isto tak, posle skrenejo pak ratujejo protiv svojih sosedov, kaj bi rekli delajo čistam nekaj drugo nek ono za kaj jif je dragi Božek poslal na of svet. E moj, Mile, neje vse onak kak ti to misliš, dosta toga ste ti i tvoja bratja zakuhali kaj se nebre sam tak pozabiti.

Vse kaj mi obični smrtniki ne znamo zna Guglin i Internet. Tam vse moremo najti, prečitati i zazvediti. Nebrem nikak razmeti kaj bode z naše dece da oni zazvedijo kaj zabadav hodajo v školo ili pak na faks. Kaj bodo hodali ak vse kaj nucajo morejo najti na Guglino. Prvi so se počeli protiv Guglina buniti doktori. Oni so cirka okoli deset let hodali po fakultetima, bolnicaj i specijalizacijama, a ve jim dohajajo betežniki šteri vse znajo. I kak ne bode doktoro žal kaj je tulikšega cajta zgubil, a zabadaf. A i mi ljudi smo čudno raslinje, nekaj malo prečitamo na Guglino i mislimo da vse znamo. Pak je čovek ne auto jerbo ak je auto gumija prazna tre jo zakrpati i napumpati, ak auto nejde mortik nema benzina i kaj ne bodem dale nabrajal, a mi ljudi imamo svoje falige, očem reči, vsaki od nas ima nekaj čistam svojega i to je ne isto kaj i sosed ima. Verjem da ste dostipot čuli kak si sosedi i rodbina posojavlejo prahe, sirupe i druga vračstva sam kaj ne bodo morali hodati stisko delat pre doktoro, a beteg nikak da mine. Da je to vredo unda ne bi morali školati doktore nek bi još dendenes coprnice bile glavne v seli. Dragi Međimorci, preštimane Međimorke, pustite Guglina nek on dela svojega posla, a ak vas beteg muoči ravno k doktoro on brzčas nejbole zna kaj vam treba. Kaj ne bodete zišli kak je zišla moja tretja soseda Mica. Ona si je posojavala prahe jerbo so jo križi boleli. Potrošila je prahe od vsih sosedov, i od moje tece France, ali je nika ne pomoglo. Na vse zadje je ipak morala iti k doktoro. I ve ste najgerek kaj je bilo? Kaj? Bila je pucka, za tri mesece. Fajna, zdrava, skorom štiri i pol kile. Fest puca, tak bole fest kak nas krčmar z vulice. A, vidite, Guglin je o tomo pojma ne mel jerbo je Micika opče ne hodala v krčmo.

Zvir:
http://www.mnovine.hr/kolumne/Jožek%20radnik/1/Fala%20ti,%20Božek%20za%20joči%20sokolove
i(l) str. 64. sim:
http://issuu.com/mnovine/docs/mnovine1015i
Aktuelni broj i rajneši su (i) sim:
http://www.mnovine.hr/informacije/2/issuu.com/mnovine

Kolindu Grabar-Kitarović na inauguracije čuva i Zrinska garda:
http://www.mnovine.hr/vijesti/hrvatska/aktualno/kolindu-grabar-kitarovic-na-inauguraciji-cuva-i-zrinska-garda

fala Božek za Međimurje.mpg, 07:13
Recital-Marijan Belčić
Glazba-“šest let je minulo” Gusti Draksar
montaža – Mario Brezovec
https://www.youtube.com/watch?v=DqAo1noxuDY

Renata Sabljak – Dej mi Bože (inauguracija predsjednice RH), 02:03