Da vile moreju živeti vu bajkama to valjda svi znaju. Al da jedna more živeti vu varaždinskoj povjesnoj hiži, to je nekaj novoga, ali je istina.
Varaždinska vila Oršić (ona od cigli i morta) dobila je ovaj petak svoju vilu (onu kaj po zraku leti i čarobira) koja je otprla ”Festival čarobne vile Oršić”. Vila Oršić je dugo bila bez prave namene a za ove blagdane je, uz dobru volju gradskih vlasti i mladih umetnika, taj prostor iskorišten kaj bi se nutri družilo, risalo, žongleralo, glumilo, plesalo i kaj još sve ne. Za to fala ide udrugam ”Krpe i konci” i ”Era slobodnih ruku” koje su zmislile kak to se organizirati z malo penez i vremena.
Festival je počel uz žonglere koji su ognja oko sebe nametavali i ž njim se vrteli. Za njimi je došla vila koja je oko sebe mam skupila decu, a onda su i oni malo veći za njimi pošli videti kaj sve festival vile nudi. Nakon pozdrava varaždinskog dogradonačelnika Vjerana Radelića, uz blagdanski štimung i popevku dece iz pjevačkog zbora Društva naša djeca, moglo se razgledati kaj sve, uz malo mašte, vredne ruke moreju napraviti. Od prirodnih mirisnih ulja, obleki tkanih na tkalačkom stanu, sliki, umetnina, lutki koje su kakti žive od malo drota i krpi, za sakoga se najde po nekaj.
Izložene stvari morete pogledati od 9 do 18. prosinca, pondeljkom i petkom od 3 do 8 popoldan, a subotom i nedeljom od 9 vjutro do 8 navečer.
Za vreme trajanja festivala deca moreju i sama narisati svoju Božićnu vilu, pak bu onda izložba svih radova. Saki dan budu i kreativne radionice za koje ništ ne treba platiti. Volja je mladih kreativci da se taj prostor uredi vu jedno kakti malo kazališče, veli voditeljica udruge Krpe i konci, Željka Kozulić. Ko zna, morti se vila tam i trajno nastani.