Ladetina:
vlada v-ladu, vu sene
* * * * * * * * * * * * * * * * * * * * * * * *
Međimurske novine, br. 943, 11.10.2013.
e-vundano 14.10.2013.
Premišlavanje Jožeka radnika
Deca moja deca, nikaj na te mela, Vlada vam je kriva
Nej znati kaj bode pravzaprav z našom decom? Najme kaj, deca nam hodaju vu vsakefele škole, fakultete i dok to vse zbavijo kaj kanijo čaka jiv mesto vu našoj nejvekšoj fabriki, a to je Burza dela. Pak, ljudi moji, mi ne pošiljamo deco v škole kaj bodo posle punili burze. Z jedne strane so nam deca na burzi, a z druge strane vlada tira nas stareše, očem reči, fosile, kaj bodemo delali do sedamdeset let.
Naši nejbolši bodo odišli vum, tak da bode nas Međimorcov vse meje i meje, jer ne bode mel što delati male Međimorce.
Naši bodo odhajali vum, a k nam bodo hodali na posel, Mađari, Rumuni, Bugari, Bosanci, Srbi, Bajaši i Turci. Oni si bodo prinas kruha služili i mejali demografsko sliko našega falačka zemle med dvemi vodami. Tak da bode tua slika v boji jerbo nam bodo posle i mali Međimorci vu vsemaj bojaj. A kaj se more da “kukurikači” sam kukuričejo i zobačijo peneze mesto kaj bi otpirali nova radna mesta, i to ona štera so pred dve leti obečuvali, tak kaj naši mladi ne bi morali hodati kruha služit vum z Lepe naše.
Piše: Jožek radnik
Nej znati kaj bode pravzaprav z našom decom? Najme kaj, deca nam hodaju vu vsakefele škole, fakultete i dok to vse zbavijo kaj kanijo čaka jiv mesto vu našoj nejvekšoj fabriki, a to je Burza dela. Pak, ljudi moji, mi ne pošiljamo deco v škole kaj bodo posle punili burze. Z jedne strane so nam deca na burzi, a z druge strane vlada tira nas stareše, očem reči, fosile, kaj bodemo delali do sedamdeset let. Rečite mi, prosim vas lepo, kak težak more dobro delati z sedemdeset let, a dok mladi tuhnijo na burzi i počnejo prve dneve težačkoga staža skupljati z tridestipet let. Vsi znamo da stareši od šest banki sam čakajo penzijo, a mladi so, posle škole i fakulteta, nejspametneši i nejveč znajo, tak gda bi jim unda trelo dati priliko da pokažejo kaj so se navčili i kaj znajo.
Kak svetlo na krajo težačke burze pojavili so se oglasi gde stranjske zemle iščejo težake med našom decom jerbo ak ga prinas ne posla v Nemačkoj, Švicarskoj, Šveckoj, Danskoj, Kanadi. nucajo težake. Što bo odišel želocom za kruhom? Samo mladi i školani šteri več nebrejo čakati posla prinas, a očejo se skinuti z grbača svojih roditelov. Odišli bodo oni šteri nejveč znajo. Naši bodo počeli ve odhajati, kak so negda to delali japeki, strici, vujci, teteci i to sam na pet – šest let kaj si nekaj zaslužijo i mam se dimo vrnejo. A nigdar so se ne vrnuli, nek i ve da so v penziji vuni živijo. To je još ne vse jerbo i jiva deca so ostala vuni, a i tam stanujejo. Naši nejbolši bodo odišli vum, tak da bode nas Međimorcov vse meje i meje, jer ne bode mel što delati male Međimorce. Mesto jiv bodemo meli male Kanađane, Šveđane, Švicarce, Švabe, šteri korene vlečejo z Međimorja. Komo smo unda delali vrtece i škole i za koga rastejo te mladi dečki i puce. Pak nam bodo stranjski bogatuni pobrali ono nejvredneše kaj imamo, a to je mladost i spametne težake štere smo zaškolali. Naši bodo odhajali vum, a k nam bodo hodali na posel, Mađari, Rumuni, Bugari, Bosanci, Srbi, Bajaši i Turci. Oni si bodo prinas kruha služili i mejali demografsko sliko našega falačka zemle med dvemi vodami. Tak da bode tua slika v boji jerbo nam bodo posle i mali Međimorci vu vsemaj bojaj. A kaj se more da “kukurikači” sam kukuričejo i zobačijo peneze mesto kaj bi otpirali nova radna mesta, i to ona štera so pred dve leti obečuvali, tak kaj naši mladi ne bi morali hodati kruha služit vum z Lepe naše.
Ivek Perhočov, naš negdašnji župan, je znova završil v Čakomo, tak da ve Čakom ima jednoga direktora, očem reči, direktorico, a to je gospođa Avirović i dva tehničke direktore: jednoga za smetje, to je gospon Avirović, a drugi je ve Ivek, šteri ima prek sebe grobje i vse ostalo. Dosti dugo se pripovedalo kak so gospon i gospođa Avirović v sukobu interesa jerbo skup delajo, a skup i spijo, pak se ve Ivek porinul med jiv kaj se te sukob ne bi tak jako videl. Nekak mi je jako čudno da so ga zeli jerbo odnavek se pripovedalo med ljudima da gde so dva, tretjega ne tre. No, kak zgledi, gda je politika v pitanju niti narodne poslovice ne vredijo.
Kak i ves običen svet, tak i mi Međimorci očemo vse znati o našemo friškomo i nejmlajšemo i naj… župano. Vse smo zazvedili. Nejpredi da mo je Marijica z Međugorja pomogla kaj je opče došel v županovo foteljo, a posle je na svetlo dneva došlo i to da vsaki den, dok ftegne, beži i tak održavle kondicijo za tej stresni posel, šteroga ve dela. Povedal nam je i to da je jako fleten jerbo 14 kilometrov prebeži za sedemdeset minot, a to vam dojde da beži cirka okoli dvjesto metri na minoto. Morem vam reči da sam mo jalen na takšoj kondiciji jerbo je prefleten za vse nas rekreativce, šteri smo fletneši sam unda dok bežimo od hiže prema krčmi. No, šalo na strano, ak je tak fleten unda se nigdar ne bode oženil jerbo štera ga puca bode mogla dostići kaj mo natekne prstena na roko? Ili bode moral malo pomeje bežati ili pak bode ostal stari dečko??!!
Vsi smo mi Međimorci preštimani i jalni, vsi imamo radi svojega falačka zemle, očem reči, cvetnjaka med dvemi vodami, ali se nigdar ne štimamo žnjim. Mora nam dojti Rade Šerbeđija kaj nam pove kak je prinas vse lejpo i dobro kaj se tu najde. A kaj se bodemo mi falili gda nam nišči ne verje, a Rade se vseposot po sveto poteple, on je svecki potepuh i jemo vsi verjejo.
Dok se pobiralo grozdje za našo “Katružo” po goricaj tam se našel i negdašnji precednik Lepe naše Štef Mesičov. On je naglas pofalil nas Međimorce kak je to lepo kaj se naša “Katruža” briga za betežnike šteri si nebrejo leke kupiti. Lepo nam je dal moralno podrško (a za to v apoteki nikaj nebrete kupiti), ali je ne porinul roko v žep i nekaj pustil v škreblico. Pak on zna gda so to naši betežniki i naši peneze i brzčas se je ne štel mešati. Ali je pozabil gda smo i mi v Lepoj našoj i imamo iste peneze kak i Hrvati prek Drave!
Naši međimorski policaji so dobili svojo kapelanijo i svojega kapelana, tak gda jim ve bode pri roki za vse nevole štere oni imajo. Vse smo to čuli i zafalili se biškupo Jureko Jezerinco kaj jim ga je dal, ali sam jako najgerek je li bodo policaji morali hodati na spoved sam k veličasnomo Iveko ili bodo mogli i drugam? I je li bode isti velečasni za policaje i policajke? No, ne morajo biti strahom, velečasni ne piše zapisnika v spovedalnici i grehi nejdo na stol načelniko nego dragomo Božeko.
VESTI IZ 2041. leta:
– v Evropskoj uniji ostali so sam Bosanci, Hrvati, Janezi i Srbi, a pred vratima čakajo Crnogorci i Makedonci,
– HDZ je osvojil vlast v Čakovco, Nedeliščo i Strahoninco,
– Međimorec Štef z Inkejevice je kandidat za Nobelovo nagrado z kemije. Iskemijal je obeda za celo svojo familijo za 10 kuni i još so mo ostale 4 kune!
Zvir:
http://www.mnovine.hr/novo/index.php?option=com_content&view=article&id=22883:deca-moja-deca-nikaj-na-te-mela-vlada-vam-je-kriva&catid=301:joek-radnik&Itemid=575
i(l) str. 56. sim:
http://issuu.com/mnovine/docs/mnovine943i
i(l) str. 56. sim:
http://www.mnovine.hr/images/pdf/943/mnovine943i.pdf
Teta Liza i Lado – Deca, moja deca, 03:00
