Podignite oči svoje na ov križni puot,
die je Jezuš pred Pilatom dopeljan na krivi suod.
Križni puot
Reči i napev: Florijan Andrašec
1.
Podignite oči svoje na ov križni puot,
die je Jezuš pred Pilatom dopeljan na krivi suod.
Ovo prva je postaja gorke muke Njegove,
gdie nedužen bez krivice ve na smrt obsuđen je.
2.
Drugu gliejte tuo postaju i muke premislite,
od glave do pete v ranah i mrsko popljuvan je.
Gdie na Njegvo svieto rame teški križ postavljen je,
kojega na Kalvariju za griešnike nesel je.
3.
Pri trietji postaji vidiš gdie sam Oca Boga Sin
gda noseči križ preteški prvič opal je pod njim.
Teška muka, kruna s trnja svietu glavu probada,
iz svake Mu rane tiela curi krvca presvieta.
4.
Pri postaji štrti Jezuš kruto razžalostil se
ar vies zmučen noseč križa svojom Majkom ziestal se.
Pogliej ovdi tuožnu Majku, buoli srca njenoga,
gdie niie smiela duojti blizu do Sineka svojega.
5.
Na pietu postaju, duša, pogliej guori da vidiš
die je Jezuš tak zmučeni da vieč nebre nosit križ,
ali trdo srce ljudsko niema pri njem smiljenja,
znovič Mu na svieta pleča meču križa teškoga.
6.
Pri šiestoj postaji gliejte svieti obraz Jezuša,
ves zmrcvarjen i krvavi, premisli si tuo, duša!
Tuo pobožna žena vidi, k njemu je pristupila
i z ruobačom Mu brisala znoj z obraza svietoga.
7.
Pri siedmi postaji, griešnik, pogliej Boga svuojega
gdie pod križem drugič opal radi grieha tvuojega.
Obrni se griešnik k Njemu, izgovori ovu rieč:
„O zdigni me, Jezuš, z grieha, nigdar ne bum griešil več.“
8.
Pri uosmi postaji vidiš takaj, griešna dušica,
kak jeruzalemske žene oplakuju Jezuša.
Tu nakloni svoju glavu i zdihavaj Jezušu
oplakujuč griehe svuoje ki zrok Njegve muke su.
9.
Pri dieveti je postaji bila muka Jezuša
gda po trietji puot opal pod križa preteškoga.
Zviezan, zbijen bil pod križem i nemilo tučeni,
vies vu ranah sie do kosti po kamienju vliečeni.
10.
Gliedi postaju diesetu, gdie sliečeni vieč stoji,
kako milo gliedi križa na kuom bude raspieti.
Oštri čavli pripravljeni, octa, žuča posuoda,
s kiem bu bilo napojeno svieto Tielo Jezuša.
11.
Pri postaji jedanoajstuoj zaplači si dušica,
ar tu z čavli prebijaju rouke, noge Jezuša.
Ove neizmierne boli Jezuš za nas čutil je,
kaj izbavil nas od grieha koga Adam fčinil je.
12.
Pri dvanoajstuoj pak postaji srce žalost predira
ar vidimo Boga svuoga gdie na križu vumira.
Suonce, miesec je potemnil, zburkala sa zemlja se,
Majku svuoju jie izručil, svuoju dušu spustil je.
13.
Nut pri postaji trinoajstuoj Jezuš z križa duol je ziet
i žaluosni Majki svuoji vu naručaj mrtev diet.
Tu premisli vielku žalost štieru teško zrieči je
ar vu jieno svieto srce sedem mečov vbolo se.
14.
Četrnoajsta je postaja ovog puota križnoga,
tu vu gruob polažu Tielo Jezuša raspietoga.
Zadnja žalost Njegve Majke da Jezuš pokopan bil
tak je za nas križnog puota svuoje muoke završil.
Zvir:
Hrvatske cirkvene i svetovne pop(ij)evke Florijana Andraš(e )ca, kantora v Dekanovcu v Međimurju
Skupil i stručno vredil: Miroslav Vuk-Croata
II. prešireno vundajne
Zagreb, 2002.
* * * * * * * * * ** * * * * * * * * * * * * * * * * * * *
Isusovo raspeće i smrt, 09:36
Prizor z scenskoga prikaza“ Jezušove muke“ v Zaprešiču, Novi dvori, Cvetnica 1.4.2012.
